KUCHING: Festival Wonderful Indonesia nyadi pelasar ngenegapka agi kaul enggau kerejasama entara Indonesia enggau Malaysia kelebih agi Sarawak.
Sapit Direktor Kandang Menua Kalimantan, Sarawak, Brunei & Sabah, Opis Menteri Dagang Temuai Indonesia, Sapto Haryono madahka, festival ke diatur nyerumba Hari Kemerdekaan Indonesia nya dikena merindang raban bansa nyengkaum peranak menua ti berimbai enggau Indonesia.
Festival ninting taun nya diatur Opis Menteri Dagang Temuai Indonesia, lalu taun tu diatur ba Entikong kena 18 ngagai 19 Ogos, nyerumba Hari Merdeka Indonesia kena 17 Ogos.
“Dalam kami ngintu Hari Merdeka tu kami deka merindang raban bansa ukai semina Indonesia tang pengerami tu mega deka dikunsi kami enggau Malaysia kelebih agi rayat di Sarawak.
“Pemadu beguna tuju festival tu ukai semina ungkup rayat Indonesia aja tang dikena ngerapitka kaul entara kededua menua, laban kitai bisi kerejasama dalam bidang main asal, seni enggau ke bukai.
“Kitai patut terus nempa kerejasama enggau ngerapit kaul, kitai seperugan nya alai pengaga nya pengaga begulai,” ku iya lebuh dikerandau raban pengarang berita.
Dulu ari nya Sapto nyadi chairman aum Festival Wonderful Indonesia di Entikong 2018 ke diatur ba sebuah hotel ditu, kemari.
Sama bisi ngulu aum nya pengari ari Opis Menteri Dagang Temuai, Seni, Main Asal, Nembiak enggau Lumba enggau Main Sarawak, Opis Imigresen Malaysia Sarawak, Majlis Keselamatan Nengeri Sarawak, polis sereta ejensi perintah bukai ba Sarawak kelimpah ari pengari Opis konsulat Indonesia enggau ke bukai.
“Beduduk ari kededua menua kelalu semak kami ngarapka mayuh agi rayat Sarawak datai ngagai festival tu sereta ngarapka atur pengawa ba garis entara menua kededua piak ulih dipejalaika enggau lanchar,” ku iya.
Kelimpah ari nya nengah penerang berita ti disadung ngagai raban pengarang berita, Sapto madahka Sarawak enggau Kalimantan Barat bisi kaul budaya ke ulih ngenegapkka kaul entara kededua menua sereta meransang mayuh agi kerejasama ke pengelantang raban bansa.
Festival nya ku iya ulih ngangkatka menua ngagai renggat antarabansa sereta dipekunsi enggau menua ti berimbai baka Sarawak.
“Nengah festival ti manah tu, ngarapka kitai ulih bekunsi gaya ke sebaka enggau ngerami gaya ti nyelai,” ku Sapto.