Anda di sini

10 iku staf Opis Betanam Betupi dilatih nyadi pakar buah rian

 Uggah begambar enggau pesereta kus sereta jurulatih.
KENANG KITAI: Uggah begambar enggau pesereta kus sereta jurulatih.

KUCHING: Sarawak ngambi singkang keterubah ngambika nyadi pengeluar besai buah rian nengah chara ngelatih 10 iku staf Opis Betanam Betupi (DOA) ngambi nyadi pakar buah rian.

“Diatu kitai nadai pakar buah rian, tu singkang keterubah kitai iya nya ngelatih pemesai kitai ari serata Sarawak ngambika belajar lalu nyadi pakar buah rian,” pia ku Sapit Kepala Menteri  ke mega Menteri Betanam Betupi Moden, Tanah Adat enggau Pemansang Kandang Menua (MANRED), Datuk Amar Douglas Uggah Embas  madah ngagai The Borneo Post.

Ku Uggah, bala ke ngelatih n ya diambi ari Universiti Putra Malaysia (UPM) baka Associate Profesor Dr Yahya Awang, Associate Profesor Dr Siti Hajar Ahmad, Associate Profesor Dr Khairulazmi Ahmad enggau Mohd Ghazali Mohd Satar.

Kelimpah ari 10 iku orang ke pakar nya, MANRED bisi nganjung lima iku orang ke landik, 22 iku Staf Tambah lalu tujuh iku pengajar staf ngulu latih nya ke mungkur sekeda chara ngelala klon rian, biologi rian, nerenak enggau ngatur palan nerenak, nyendiaka tanah sereta nanam, maja enggau manjah ai, nyarau, nyaga indu utai enggau chara mulung buah.

“Tu program keterubah ngelatih sida nyadi pakar buah rian dikena numbuhka industri buah rian kitai,” ku Uggah.

Pengudah lima hari ngulu kus pengelala, program nya deka ditangkanka enggau latih ngagai bala pematih, ku Uggah.

Ku Uggah, bala pemesai tu deka dikaul terus enggau program ngintu rian ngena belanja RM9 milion.

“ Program ngintu nya deka dipejalaika begulai enggau Top Fruits Sdn Bhd ari Johor ti ngembuan peneleba 30 taun ba pengawa bekebun rian,” ku iya.

Ku Uggah, projek ngintu rian k eterubah tu mungkur 300,000 pun rian di serata Sarawak k elebih agi di Serian, Betong, Limbang enggau kandang menua Baram.

“300,000 pun nya anggar kasar  tang kitai ulih nambahka pemansut enggau kualiti buah rian, lalu Sarawak deka nyadi sebuah ari nengeri pengeluar besai dalam industri buah rian ,” ku iya.

Lebuh ditanya berapa lama perambu nya ulih dikemujur,ku Uggah pemujur nya bepanggai ba pemansang pengawa ngintu pun rian ke begunaka timpuh urung lima taun.