KUCHING: Mimbar Serakup Apai Indai Malaysia (MAPIM) Sarawak nyukung atur ngena kasut chelum ungkup nembiak sekula berengkah taun baru.
Atur ngena kasut chelum nya dipansutka Menteri Pelajar, Dr Maszlee Malik nengah sebengkah program ba Shah Alam ensana.
Pia mega MAPIM Sarawak kenu ku Tuai Dipebasa Omar Immun andal pemutus nya digaga pengudah berundingka penemu apai indai nembiak empu.
“Kami pechaya, opis menteri tentu udah berunding ngaga perati ke manah ari mayuh sukut sebedau pemutus tu digaga.
“Atur ngena kasut chelum tu nadai meri pangka besai ngagai pekara belanja apai indai, laban timpuh nyikap diri kira chukup.
“Tambah mega tu sebengkah atur ke manah ari sukut psikologi nembiak dibanding ngena kasut burak mudah kamah lebih agi enggau gaya hari ke nadai tentu,” ku iya maya dirandau kemari.
Tandau Omar, ngena kasut chelum ukai trend baru tang udah dipejalaika ba sekeda menua baka Brunei, Filipina enggau Indonesia.
Nya alai, ku iya MAPIM Sarawak nyukung polisi ngena kasut chelum tu berengkah taun baru.
Iya mega ngarap atur tu disukung semua puak laban beguna amat dikena nentuka sistem pelajar menua bejalai enggau mujur.
“Besai pengarap kami ba MAPIM deka meda Opis Menteri Pelajar terus regas ngemansangka sistem pelajar menua.
“Nyadika tambah, MAPIM Sarawak mega nyukung pengawa Dr Maszlee ke ngembuan juluk deka ngasuh bala nembiak ba Malaysia ngembuan pengelandik nguasa lebuh ari dua jaku,” ku iya ke mega Ketuai Pemadah MAPIM Nasional.