KOTA KINABALU: Pinokianu oh sontob lungkitas ngawi do pongia'an boros id Longkod Ponginabasan Toilaan om Boros (PPIB) Universiti Malaysia Sabah (UMS) montok popoburu ponoriukan pointopong sompomogunan om nogi minsomok do mogiigiyon ngawi montok popoilang do toilaan om komilaan.
Pongunsuban nopo dilo nga pinolombus di Dekan do PPIB UMS, Prof. Madya Dr. Jualang @ Mohd. Azlan Gansau ontok pinogitimungan do lungkitas ngawi do longkod dilo id universiti nokomoi di kosuabon baino.
"Nosiliu toguangon tagayo toinsanan lungkitas montok mongotus do ponoriukan di kotopong do toilaan sompomogunan om nogi papabaagi toilaan kumaa mogigiyon ngawi," ka dau.
Somok hatus oh lungkitas om upisor monoina koupisan do PPIB nokotindapou do pinogitimungan dilo.
Poingampai nogi potindapou ih Prof. Madya Dr Andreas Totu, lungkitas poingigit om popoburu do Kursi Kadazandusun id UMS.
Di kopongo pinogiitimungan dilo, nakapanau oh pinogiilangan makan kopihondot do Tadau Raya di nakatalib.
Ontok pinogirurumaan dilo, nosiwatan pinopointutun oh piipiro lungkitas ih kawawagu nogi monimpuun do karaja pongiaan id longkod dilo.
Pinopotunui nogi Jualang do tanda kaandaman kuminaa do upisor ngawi di koundaliu do karaja id koupisan suai id suang kampus UMS.