KUCHING: Opis Menteri Betanam Betupi Moden, Tanah Adat enggau Pemansang Kandang Menua nengah Opis Servis Veterinar deka chakah agi ngeluarka asil pemakai tepilih ari nupi jelu lalu dieksport ngagai makit menua luar.
Sapit Kepala Menteri Datuk Amar Douglas Uggah Embas madah, opis menteri iya deka komited nambahka penyampau pemansut asil pemakai tepilih.
“Bekaul enggau sektor nupi jelu, opis menteri aku nengah Opis Servis Veterinar deka gawa bekempit agi enggau kompeni ladang babi nengeri tu.
“Tu dikena nentuka pengawa ngeluarka babi ke dieksport ngagai Singapura lebih tetap tauka tegap nitihka standard kualiti enggau penyampau guna dipinta makit Singapura,” ku iya ke mega Menteri Betanam Betupi, Tanah Adat enggau Pemansang Kandang Menua.
Uggah mansutka pekara nya lebuh ti nyimpul jurai Opis Menteri Betanam Betupi, Tanah Adat enggau Pemansang Kandang Menua ba Aum Kunsil Nengeri Ke-18 hari Ke-8 ti diatur ba Kompleks Kunsil Nengeri ditu, kemari.
Nitih ku iya, industri babi ba Sarawak maju sereta udah mujur nyapai self-sufficiency level (SSL) 109 peratus enggau penyampau penguna perkapita 17.32 kg.
“Diatu perintah eksport tauka nyual 1,250 babi idup sereta babi beku Singapura ninting minggu.
“Dianggarka urung 39,000 iku babi idup enggau rega ti dianggarka RM45 milion deka dieksport ke menua Singapura taun tu,” ku iya.
Kelimpah ari nya bekaul enggau sarang burung ke ulih diempa, Uggah madahka Opis Servis Veterinar mega deka nentu sereta ngenegapka produk nya ti dieksport ke menua China nitihka standard kualiti China.
Opis nya diatu mantu industri dalam ‘system’ RFID baka ke dipinta Agensi Akreditasi China sereta ngelakuka myGAp dikena nentuka kualiti enggau pemanah pemakai nya ke pengerai.
“Dalam taun 2017, Sarawak ngerikod penyampau rega eksport tauka jual sepenyampau RM28 milion ari EBN ,” ku iya.
Uggah berebak enggau tu madahka kelimpah ari Pasir Putih di Simunjan, perintah udah ngelala dua kandang endur baru ungkup Pig Farming Area (PFA) iya nya di Selangau, Sibu enggau di Semarakan, Bintulu.
“Opis Servis Veterinar deka mansik penengkeman kandang sitak Meluan endur numbuhka PFA,” ku iya seraya nyaut isu ke dibantaika Kaban Kunsil Nengeri (ADUN) Meluan, Rolland Duat Jubin.