KUCHING: Perintah nengeri enda meransang pengawa numbuhka pangku pengawa baru Ketuai Raban Bansa ungkup kes rumah panjai tauka genturung pendiau ti pambar.
Sapit Kepala Menteri, Datuk Amar Douglas Uggah Embas ngenang pekara nya ti bekaul enggau bala tuai rumah enggau ketuai genturung pendiau ke bedau dichiri enggau rasmi.
“Kenyau ari 17 Februari 2000 nyentuk ke diatu, perintah nengeri semina deka berundingka peminta rumah panjai ti bisi 20 pintu tauka lebih aja, baru ulih numbuhka pengawa Raban Bansa.
“Taja pia, perintah nengeri enda ngemendarka pengawa numbuhka pangku pengawa baru Ketuai Raban Bansa ngagai kes ti bekaul enggau pambar rumah panjai tauka genturung pendiau asal,” ku iya seraya ti nyaut isu ke dibantaika Kaban Kunsil Nengeri (ADUN) Batu Danau,
Uggah ti mega Menteri Betenam Betupi Moden, Tanah Adat enggau Pemansang Kandang Menua mansutka pekara nya lebuh ti nyimpul jurai Opis Menteri nya ba Aum Kunsil Nengeri Ke-18 Hari Ke-8 ti diatur ba Kompleks Kunsil Nengeri ditu, kemari.
Iya mega madahka peminta nambahka kriteria pengawa nyiri Ketuai Komuniti enggau Ketua Raban Bansa (KMKK) ba Nengeri Sarawak baka ti dilanggur ADUN Lingga Simoi Peri,deka diperundingka perintah nengeri.
“Ke penerang ADUN Machan (Allan Siden Gramong), pengawa nyiri baru KMKK bagi Pelilih Menua Kanowit udah dikemendarka kena 1 Julai 2018 nengah Komiti Panel Milih KMKK Bagi Menua Sibu.