MIRI: Bisi 19 iku Kaban Parlimen (MP) ari Gagasan Parti Sarawak (GPS) enda ngenggaika speaker Parlimen ke baru dichiri, lalu ngenanka diri ba penuduk di Dewan Parlimen seraya bala MP penyakal bukai ti ningkah pengawa nya pansut bebala mayuh rambau aum parlimen Malaysia keterubah kenyau ari bepilih besai 9 Mei kena Hari Satu (16 Julai) tu tadi.
MP Sibuti Lukanisman Awang Sauni madahka raban GPS enda nunda pengawa bala UMNO, PAS ti ngemansutka diri pengudah Menteri Besai Mahathir Mohamad mantaika nama chalun ex-Akim Kort Apil, Mohamad Ariff Yusof ngangkat sumpah mangku pengawa Speaker Dewan Rakyat tauka Parlimen.
“Tu keterubah nya semua MP GPS meruan duduk begulai lalu ngenanka diri enggau pengawa ngangkat sumpah,” ku Lukanisman madah ngagai The Borneo Post kemari.
Menteri Besai Tun Dr Mahathir Mohamad maya nya nyakunka nama Mohamad Ariff pengudah aum Dewan Rakyat berengkah urung pukul 10 pagi.
Taja pia lebuh sekretari parlimen macha ba mua mayuh pengawa nyirika iya, MP Kota Bharu ari Parti Islam SeMalaysia (PAS) Tak iyuddin Hassan betanya kati pengawa nyalunka Mohamad Ariff nitihka undang-undang menua.
Iya nyebut atur parlimen ti madahka sekretari patut dipadah nengah surat ba perambu milih speaker kandang 14 hari sebedau baum lalu madahka pekara tu enda dikereja.
Ku Lukanisman, bisi charut mimit lebuh mayuh agi bala MP ningkah pengawa nyiri nya, tang atur pejalai milih speaker diteruska.
Ku iya nandu, raban MP penyakal ari Barisan Nasional (BN) enggau PAS udah nya mejah sereta pansut ari balai baum kelai mantah pengawa nya.
Lukanisman nyemetak madah ke alai sida (GPS) enda enggau begau pansut lalu netapka penemu diri diau jenuh sereta nurutka atur aum.
Ku iya, tu iya nya aum keterubah ungkup GPS, semua MP enda nitihka singkang raban bukai tauka ningkah pengawa nya.
Diatu bala GPS semina neutral aja begulai enggau tiga agi ex-UMNO ke bukai.
Seraya tiga MP UMNO iya nya MP Rembau Khairy Jamaluddin, MP Kimanis Datuk Seri Anifah Aman enggau MP Labuan Datuk Rozman Isli enda nyempulang bala ti pansut ari balai aum.