KUCHING: Opis Menteri Betanam Betupi Moden, Tanah Adat enggau Pemansang Kandang Menua deka ngangkatka penatai pemisi ruang bilik menua pesisir, ke endang nyadi objektif besai opis menteri.
Sapit Kepala Menteri ti mega Menteri opis nya,Datuk Amar Douglas Uggah Embas madahka nya mega sebengkah ari pengeran opis menteri deka ngurangka tikas penatai pemisi ke enda sebaka entara ruang bilik di menua pesisir enggau mengeri.
“Dikena ngetan tauka ngenegapka penatai pemisi ruang bilik napi penurun enggau peniki rega barang, orang betanam betupi diperansang ngemeranka lebih ari siti aktiviti betanam betupi,” ku iya.
Uggah mansutka pekara nya lebuh ti nyimpul jurai Opis Menteri Betanam Betupi Moden, Tanah Adat enggau Pemansang Kandang Menua ba Aum Kunsil Nengeri Ke-18 Hari Ke-8 ti diatur ba Kompleks Kunsil Nengeri ditu, kemari.
Iya madahka sekeda ari aktiviti betanam betupi ke tau dipejalaika raban betanam betupi ti ulih mantu nyungkak penatai pemisi ruang bilik baka industri bepelasarka agro,sektor nupi jelu, akuakulltur enggau bukai kelimpah ari opis menteri ke bisi mantu sereta bejalaika sekeda Program Kenggau utai tanam pemakai.
Nitih ku iya dalam taun 2018, perintah bisi ngungkupka belanja RM1.8 milion ke udah dikemendarka dikena bejalaika Program Orang Dagang Nupi Kerebau (BEP).
Dibaruh indutri bepelasarka agro, bisi 194 iku pesereta ke diatu ti teulihka penatai pemisi puku rata RM11,800 sebulan.
“Nya alai berindik ari pemujur program nya, belanja tambah sepenyampau RM3 million udah diungkupka ba taun 2018 dikena mantu pesereta ke baru.
“Nambahka nya, sepenyampau RM9.50 milion udah dikemendarka dikena numbuhka dua Palan Proses Inkubator di Kuching enggau Miri. Palan tu mega dikemendarka Good Manufacturing Practices (GMP); Hazard Analysis Critical Control Point (HACCP) enggau Jamin Kualiti Halal dikena nentuka produk ke udah tembu orang dagang ulih nitihka peminta Standard Makit Antarabansa (IMS),” ku iya seraya madahka nya deka nambahka peminta makit ngagai produk nengeri tu.
Kelimpah ari nya, Uggah madahka akuakultur siti projek ti meri empas tinggi ke ulih ngangkatka penatai pemisi menua pesisir.
Iya madahka nupi ikan dalam sangkar baka ba Batang Ai ngayanka penyulut sereta mujur ngeluarka ikan ke lalu ulih napi peminta makit domestik.
Projek ikan talapia dalam sangkar Batang Ai berengkah kenyau ari taun 1992 enggau 613 sangkar nambah ngagai 9,434 sangkar betaun ke udah.
“Penyampau asil ke dipansutka diatu dianggarka 700 metrik tan. Sekeda pesereta projek nya diatu teulihka penatai pemisi lebih RM4,000 sebulan. Palan nya mega ditukuka dibaruh myGAP ti nyamin kualiti ikan ke diasilka,” ku iya.
Kelimpah ari nya, Uggah madahka orang betanam betupi mega ulih nambahka penatai pemisi ruang bilik nengah chara bekebun mit sawit enggau ngubah gaya menua pesisir nengah pengawa ngemansangka tanah NCR.
Sawit mega komoditi ke ulih mantu nyungkak penatai pemisi orang bumai bekebun menua pesisir nengah pengawa ngemansangka tanah NCR sida ngena pengawa nanam sawit.
“Naka ke sehari tu, bisi 212,142 hektar ditanam sawit ti nyengkaum 36,787 pekebun mit enggau puku rata ngembuan pemesai saiz 7.2 hektar. Bepelasarka pemesai puku rata saiz, pekebun mit nya ulih ngasilka penatai pemisi RM5,760 sebulan,” ku iya.