MIRI: Malaysia udah nyapai sistem dua parti, demokratik ke besai amat reti ngagai menua kitai.
Sekretari DAP Sarawak, Alan Ling Sie Kiong ngarapka tu deka nyadi baka selama dalam sistem politik Malaysia ke alai ubah ari perintah iya nya semina atur pengawa baka selama.
“Penuduk rayat tinggi agi diatu, sida ngasaika undi sida bisi rega lalu kaul sida ba pengawa bepilih endang ulih ngaga bida,” ku Alan madah ngagai The Borneo Post lebuh nguluka bala kaban DAP Miri enggau Piasau ngelawa Parlimen ngemataka pengawa besejarah.
Sama bisi datai nyempulang raban nya, Chairman DAP Miri, Peter Hee.
Nitih ku Alan, sida seraban datai ari Miri deka meda keterubah iya dalam timpuh 60 taun ba pengawa nempa menua bansa enggau politik di menua tu udah nyapai sistem dua parti.
Ku iya, rayat badu agi ngasaika diri nadai kuasa, sida empu meda kuasa diri rambau Pengawa Bepilih Besai Ke-14 tu tadi ke alai pinta enggau undi rayat ngubah perintah.
Iya nyemetak madah, kenyau ari tsunami poltik dalam taun 2008, lalu pengudah 10 taun, pengekih enggau pengepuh gempung penyakal ngasuh juluk sida megai menua nyadi nyata.
Ku Alan, bala kaban DAP berasai lantang enggau gagit ba kabinet baru betuaika Tun Mahathir Mohamad ti ulih muai perintah BN ke dulu.
Iya nyemetak madah ke alai diingat gawa baka selama ngagai raban politik ngambika peminta rayat lebih agi ari diri empu, ngembuan intergriti ba pengawa ngatur pengaya menua, ngambika rayat enda deka majak muai perintah.
“GE14 nyin tadi mega ngingatka semua kitai ke alai wang enda ulih meli ati rayat, Semina polisi enggau atur perintah ti manah deka ngetanka sukung rayat.
Berebak enggau nya, raban DAP ari Miri enggau Piasau mega dipelaba deka ngabas Opis DAP Sarawak di Putra Jaya, Chong Chieng Jen ke nyadi sapit menteri ba perintah dipegai Tun Mahathir.
Sida sebuat mega dipelaba deka ngabas beberapa menteri.