KUCHING: Perintah Sarawak sedia deka berunding ngagihka ungkup belanja ngagai kaban Pakatan Harapan di nengeri tu, nyema Perintah Besai Pakatan Harapan ulih berundingka pekara ti sama.
Kepala Menteri, Datuk Patinggi Abang Johari Tun Openg madahka Gabungan Parti Sarawak (GSP) deka nempa kerejasama enggau Perintah Besai baru ti besemaya deka nadai bechiping sereta efisyen.
Iya madahka pengari ba Sarawak patut ulih gawa begulai enggau pangan diri, seraya ngemansangka GPS, nempa kaul enggau pakatan baru ke pemerat Sarawak enggau rayat Sarawak.
“Perintah Sarawak deka berundingka pengawa nyendiaka ungkup belanja di baruh Projek Mit Pemansang Menua Pesisir ngagai Kaban Pakatan Harapan (PH), dikena malas baru ungkup belanja nyema Perintah Besai nyendiaka ungkup belanja ti sebaka ngagai GPS,” ku iya.
Abang Johari mansutka pekara nya lebuh ti bejaku nutup jurau Aum Kunsil Nengeri Ke-18 hari Ke-8 ba ti diatur ba Kompleks Kunsil Nengeri ditu, kemari.
Dulu ari nya Abang Johari madahka Perintah Sarawak deka ngungkupka ikas maksimun sepenyampau RM1 juta ngagai tetiap iku Kaban Kunsil Nengeri (ADUN) GPS.
Ungkup belanja nya dikena bejalaika Program Ngemanah Rumah taun tu, ku iya.
Nambahka nya perintah nengeri seruran deka ngemanah tauka ngaluska polisi sereta gawa enggau profesional agi.
“Aku deka madah iya nya Perintah Sarawak deka ngungkupka ikas maksimum sepenyampau RM1 juta ngagai tetiap iku ADUN GPS dikena bejalaika Program Ngemanah Rumah di baruh Program Perumahan Rakyat Termiskin (PPRT) ba taun 2018.
“Tang ke pemadu beguna ditu, kami deka terus ngemanahka polisi sereta bejalaika institusyen perintah enggau chara profesional ngambika ekonomi ulih numbuhka peluang gawa ti manah, kelebih agi ke tampak enggau pemanah kitai,” ku iya.
Bejaku baru iya madahka berindik ari gaya politik ti udah berubah, Perintah Sarawak deka bebendar agi nentuka nengeri tu bulih hak ke patut sereta gawa lebih bebendar nyendiaka infrastruktur kelebih agi ngagai raban bansa di menua pesisir, sereta pia mega peranak di mengeri nengah peluang beranakka puku enggau kereja.
Abang Johari lebuh ti ngenang baru, madahka Perintah Nengeri deka rat gawa enggau Perintah Besai ke ti diiring Menteri Besai Tun Dr Mahathir Mohamad tauka nempa kaul ti manah enggau Putra Jaya ke pemaik enggau penguntung rayat enggau nengeri.
Nengah chara nya ku iya, perintah nengeri ulih ngandalka Perintah Besai ke baru, iya nya barang bagi pekara ke deka dijapai ba renggat nasional, sama mega deka dijapai ba Perintah Sarawak ba renggat nengeri.
“Tambah mega, ke nyata maya Pengawa Bepilih Besai Ke-14 (PRU14), parti Sarawak dalam perintah ke diatu menang 19 sitak ari 31 sitak parlimen ti meri majoriti 61 peratus .
“Agenda besai kami iya nya deka ngintu pemerat menua enggau nyaga hak kitai baka ke udah ditulis dalam Konstitusyen Malaysia enggau Sempekat Malaysia 1963,” ku iya.