SIBU: Mensia mayuh ditangkan enda mai jelu inang sida ngagai palan rekreasyen laban sida nyangka deka ngamah tauka ngaga kachau ba palan ti diungkupka aktiviti belepa.
Sapit Chairwoman Opis Kaunsil Mengeri Sibu (SMC) Rogayah Jamain mansutka jaku lalau iya tu lebuhka dipinta nimbal pasal pekara siku pengempu jelu inang apin lama ke udah, nejuka ukui iya bira ba geladak semin di lupak pejalai di Sibu Town Square Phase 1.
“Mensia mayuh dilalau ngambika enda mai jelu inang sida ngagai taman laban nyangka jelu sida nya bira ti deka mai pangka ngagai rampa laban taman tu endur mensia mayuh deka belepa sereta ngasaika kesuh angin.
“Lalu tai jelu nyangka tauka ngamahka selap kaki mensia mayuh mega,” ku iya nangkan.
Pia mega ku iya, enti pekara tu nyadi, pengempu jelu dilalau ngambika meresi tekala nya.
Ba lansa bukai, siku orang ti ngembuan pengandal ba pengawa belanda lebuh ditanya bekaul pekara ke nyadi apin lama ti udah, madahka pengempu ukui baka ke nadai penangi ari pengamah ti digaga jelu inang sida.
Iya mega madahka diri nyauka teindikka tai jelu nya.
Ku iya, bisi bekau tai ti diindik ngelingi endur nya lemai nya – nyangka enda sengaja diindik orang bukai ti bejalai dia.
“Aku ngasaika semua kitai bisi tanggungpengawa nyaga pemeresi tengah mengeri nyengkaum muai uras baka umbang gula batu ngagai tung uras ti bisi disedia.”
Ba rikot, tengah mengeri kitai kelebih agi lupak pejalai suah ditengah bala orang ti ngembuan minat belanda enggau bala apai indai mai bala anak ungkup aktiviti luar.