Anda di sini

GPS nadai penanggul ngempung semua komuniti di Sarawak

Advertisement

SIBU: Gabungan Parti Sarawak (GPS) dipeda ulih ngaul diri enggau semua komuniti di Sarawak nengah peneleba semua komponen parti nya lalu ulih mai nengeri tu mansang ke mua.

Menteri Dagang Temuai, Seni, Main Asal, Nembiak, Lumba enggau Main Datuk Abdul Karim Rahman Hamzah madah munyi nya kemari lebuh ti meri penemu bekaul buah runding sekretari besai Parti Tenaga Rakyat (Teras) Banyi Beriak ti madahka siti perambu ti manah iya nya nyema Teras enggau United People’s Party (UPP) ngerunding baru penemu sentang ngempungka parti nya nyengkaum State Reform Parti (STAR) enggau Parti Bansa Dayak Sarawak Baru (PBDSB) laban semua parti tu iya nya parti asal Sarawak ke nadai dibai begempung enggau GPS.

Banyi mega bisi madahka nyema sida enda dibai nyereta GPS, sida deka berundingka pilih bukai ti patut nyengkaum numbuhka parti baru ngena nama ‘Sarawak Baru’, ke dikearapka iya UPP, STAR enggau PBDSB ulih nerima perambu nya.

“Ba penemu aku empu, aku enda meda kebuah numbuhka mayuh parti politik dikena ngulihka pupu bansa di Sarawak,” ku Abdul Karim ke mega Kaban Kunsil nengeri (ADUN) Asajaya madah sentang pekara ti bekaul.

Ku iya nambah, iya mekuh ngagai demokrasyen dalam parlimen ke dipejalaika di Malaysia, sapa pan ke ngasai bisi sukung ari mensia mayuh ulih numbuhka sebarang parti politik tauka ngempung sekeda parti komponen baruh siti parti baru.

Ku Abdul Karim ke mega Mandal Presiden Parti Pesaka Bumiputera Bersatu (PBB) madah, rayat ti kebendar bekuasa nentu sekalika parti ke digempung tu relevan sereta ulih diterima tauka enda.

“Taja pia, ketuai ungkup parti ‘mit’ tu meseti bejejaga nangika pengawa sida ke numbuhka parti nya deka ngeruga penyerakup rayat di Sarawak.

“STAR enggau PBDSB udah bisi kenyau ari berapa taun ke suba lalu udah ngaul diiri dalam mayuh renggat pengawa bepilih.

“Sida udah mayuh kali enda diterima rayat ba pengawa bepilih nya alai aku enda nemu sekalika rayat ulih nerima sida nyema begempung lalu numbuhka parti.

Advertisement