Anda di sini

Bungkur NTD diubah ari 500 hektar ngagai 1,000 hektar

Uggah mantaika usul nya maya Baum Kunsil Nengeri Ke-18 Hari Keempat ba Kompleks Kunsil Nengeri ditu.

KUCHING: Aum Kunsil Nengeri setuju sereta ngemendarka Rang Undang-undang Kanun Tanah (Pindaan) 2018, pengudah Seksyen 6A(2) enggau Seksyen 6A(3) diubah, sehari tu.

Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Mengeri, Datuk Amar Douglas Uggah Embas mantaika usul ngubah dua seksyen nya pengudah bacha kali ketiga RUU Kanun Tanah (Pindaan) 2018.

“Nengah ubah Seksyen 6A(2) pemesai bungkur peminta Native Territorial Domain (NTD), diubah ari 500 hektar ngagai 1,000 hektar pemesai.

“Taja pia menteri ti ngarika Majlis Mesyuarat Negeri Sarawak ulih ngemenda pinta NTD ngelui 1,000 hektar.

“Lalu ubah Seksyen 6A(3)(b) ngungkupka pengawa meri surat pala tanah guna sama peribumi ti nadai bayar premium, suwa enggau caj ke bukai kelimpah ari surat nya dikena selama iya,” ku iya.

Uggah mantaika usul nya maya Baum Kunsil Nengeri Ke-18 Hari Keempat ba Kompleks Kunsil Nengeri ditu.

Dulu ari nya maya bejuraika RUU Kanun Tanah (Pindaan) 2018 kemari, ari 35 iku ADUN ke bejuraika nya bisi 22 iku ke madahka pengirau bekaul enggau pemesai bungkur ti ditatak semina 500 hektar aja nyadi NTD di baruh Seksyen 6A.

Maya bejuraika pekara nya bala ADUN madahka pemesai 500 hektar nya bechiping laban sekeda komuniti bisi kurang tauka lebih ari pemesai nya.

“Sida (ADUN) merambuka pemesai 500 hektar nya ditambah ngagai 1,000 hektar,” ku iya.