KUCHING: Rang Undang-Undang Kanun Tanah (Pindaan), 2018 dipejalaika dikena mutarka isu enda ngaku sekeda adat Bumiputera ulih undang-undang Sarawak bekaul enggau hak ngagai tanah Adat Bansa Asal (NCR) ba nengeri tu.
Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madahka perambu ubah undang-undang mega dikena ngangkatka pemanah pengawa nyaga hak tanah asal.
“Sehari tu hari penuh sejarah ngagai peranak asal Sarawak. Nama kebuah? Laban kitai deka bulih pemutus bekaul enggau hak tanah asal lebuh Rang Undang-Undang tu dibantaika.
“Tuju RUU Kanun Tanah (Pindaan), 2018 dikena ngangkatka pemanah pengawa nyaga hak tanah asal enggau mutarka laya entara orang asal enggau piak bukai ti selalu disangka tama enda beradat ngagai tanah adat bansa asal,” ku iya.
Uggah mansutka pekara nya mantaika RUU nya ba bacha kali kedua maya baum Kunsil Nengeri Ke-18 Hari Ketiga ke diatur ba Kompleks Kunsil Nengeri (DUN), seharitu.
Perambu ubah undang-undang tu mega deka nyadika surat pala tanah NCR belama iya dikeluarka ungkup sesebengkah kandang endur ke dikumbai ‘native territorial domain’, ku iya.
Bejaku baru iya madahka tebal agi perintah meri hak ‘usufrukturary’ ngagai raban bansa asal ba atas tanah ke diuan kenyau ari asal.
“Ba Sarawak di baruh Perintah Gabungan Parti Sarawak, territorial domain diberi kuasa undang-undang sereta diaku enggau sah laban ngembuan hak belama iya.
“Dokumen surat pala tanah deka diberi ngagai raban bansa nya dikena nyaga territorial domain sida,” ku iya.