MARUDI: Menteri Muda Kaunsil Kandang Menua Datu Dr Penguang Manggil kemari ngemetulka pekara ti ngasuh saru sentang pengawa nyiri ketuai komuniti ba sitak ari baruh pegai iya.
Iya bebulaka bisi sekeda pangku pengawa nya diatu dipadahka ba baruh perati perintah besai Pakatan Harapan (PH), lalu ukai nya nengah perintah nengeri.
“Pengawa nyiri ketuai komuniti baka kunsilor, pemancha, penghulu, tuai rumah, kapitan enggau ketua kampung sereta sebarang pekara ti bekaul enggau tu agi ari perati perintah nengeri.
“Nadai utai ti ngasuh irau sentang pekara tu. Kelimpah ari ninga jaku selebubu ngapa, kitai patut mekuh ngagai pekara ti ulih ngerapitka kaul enggau pangan diri laban tu chukup berat dikena nentuka pemansang terus dipejalai,” ku Kaban Kunsil Nengeri (ADUN) Marudi nya ba jaku iya lebuh ti betemu enggau ketuai komuniti di kandang menua nya ti udah digaga bepalan ba balai komuniti Beluru di Bakong.
Program nya digaga dikena nyediaka pelasar ngagai peranak Marudi sereta ketuai komunit sida mantaika penemu sereta penanggul ti ditapi.
Tu mega dikena meri pemereti, ngajar sereta narit peranak di kandang menua nya sentang pekara ti nyadi ba nengeri enggau menua tu ti mega bisi ngaul isu bekaul gempung Gabungan Parti Sarawak (GPS) asil ari empat ex-parti Barisan Nasional (BN) nengeri iya nya PBB, PRS, SUPP enggau PDP.
“Ba Sarawak, GPS tu iya nya perintah lalu ukai pnyakal, lalu aku agi mengkang nyadi menteri muda lalu ukai nya kaban penyakal.
“Nyema agi bisi penangi, anang sanggu betemu sereta nanya aku. Pia mega, nyema bisi penemu tauka kuing ti diperati kita manah, tau terus madah ngagai aku ngambika kitai ulih begulai mai pemansang ditu,” ku iya nambah.
Isu bukai ke bisi dipekunsi maya program tu iya nya bekaul Sempekat Malaysia 1963 (MA63), tanah Hak Adat Bansa Asal (NCR) enggau hak peranak Sarawak.
Ba program nya, Penguang udah nyuaka geran Projek Mit Menua Pesisir (MRP) sepenyampau RM10, 000 ngagai Kaum Ibu Long Merigau di Tinjar, RM15, 000 ngagai Komiti Pemansang Enggau Pengelikun Genturung Pendiau (JKKK) Rumah John Mato Long Tuyut, RM5, 000 ngagai gerempung indu Rumah Labo Abit, RM5, 000 ngagai gerempung indu Rumah James Sg Sebukut, RM15, 000 ngagai JKKK Long Teran Batu Tinjar Baram, RM10, 000 ngagai Gerempung Apai Indai enggau Pengajar (PIBG) Sekula Primari (SK) Sungai Selepin, RM20, 000 ngagai JKKK Rumah Labo Abit sereta RM20, 000 ngagai JKKK Rumah Lua Sg Bakas di Bakong.
Entara ke bisi datai iya nya Sekretari Politik Kepala Menteri Alexander Asing Sadai, pengari Pemesai Pelilih Beluru SAO Marliney Igil sereta Chairman Gerempung Tuai Rumah Beluru Marudi TR Ngumbang Tia.