PUTRAJAYA: Kort Perintah Besai Putrajaya kemari mutuska peminta deka ngepunka pechara bekaul dawa hak ngempu Petroleum Nasional Bhd (Petronas) iya nya sentang asil minyak enggau gis di Sarawak.
Akim Besai Malaya Tan Sri Ahmad Maarop ti ngakim kes nya madah iya begunaka timpuh endur ngaga pemutus lalu deka madahka pemutus nya pukul 9.30 pagi.
Sama bisi datai, Menteri Muda Undang-undang, Kaul Nengeri enggau Perintah Besai sereta Matau Projek Sharifah Hasidah Sayeed Aman Ghazali, Sekretari Besai SUPP Datuk Sebastian Ting, Penyanding Penemu Undang-undang PBB Datuk Awang Bemee Ali Basah enggau pemesai khas Kepala Menteri Dr Muhammad Abdullah Zaidell.
Hasidah nengah penerang pandak iya madah ngagai media kort mendingka penerang raban luyar Sarawake ke chukup panjai.
“Besampika ke pekara pemadu manah ungkup Sarawak.
“Kitai madah Kort Perintah Besai nadai ngembuan bidang kuasa eksklusif enggau tulen dalam mendingka penerang tu,” ku iya.
Kort bechara urung dua jam berengkah 9.45 pagi lalu kes nya ngemataka Petronas ngerikodka pinta ba Kort Perintah Besai ngambi ngenuku Akta Pemansang Petroleum 1974 (PDA) nyadi undang-undang dikena ba industri petroleum di Malaysia.
Kes nya terubah iya deka dipendingka ba kort kena 12 Jun, tang dilanjar ngagai kemari.
Petronas kena 4 Jun, madah iya endang pemenggi eksklusif asil petroleum, sereta nguasa industri pemungkal ba selampur Malaysia nyengkaum ba Sarawak.
“Petronas andal kenuku ari Kort Perintah Besai deka mantu meri penerang nyemetak pasal hal enggau status dibaruh PDA.
“Petronas mengkang komited nyukung juluk Sarawak ngaul industri minyak enggau gis ba nengeri nya, seagi iya dibaruh kuasa nitih PDA,” ku kompeni nya.
Ketuai Luyar ti ngarika Petronas Datuk Malik Imtiaz Sarwar maya dirandau pemberita pengudah pechara nya madah sida udah ngaga penerang ngambi kes nya dipansutka enggau lengkas.
“Sarawak netapka 1 Julai nyadi haribulan kepenudi bekaul Petronas,” ku iya.
Malik andal Sarawak deka mantah lalu sida irau nyema kena 1 Julai lalu empai diterang, deka ayan dua mekanisme atur bekaul aktiviti ngelumbung minyak enggau gis di Sarawak.
“Tu endang sebagi ari pekara dipetalat laban sebedau Sarawak numbuhka Malaysia, sida tu menua ke dipegai British lalu semina enda lama aja iya (menua ngati kediri).
“Aku nyerah ngagai sida betalatka pekara. Nyema iya ngembuan undang-undang, nya deka dipejalai.
“Maya sida enggau numbuhka Perintah Besai Malaysia, Konstitusyen Perintah Besai dikena. Sesebengkah kuasa nadai agi ulih kena ba bidang kuasa nengeri ke nempa undang-undang,”ku iya.
Malik madah sebengkah undang-undang ke bisi ba Sarawak, mega ke bisi ba Perintah Besai deka dikumbai undang-undang Perintah Besai.
“Tu mih penerang kami. Akta Pemansang Petroleum (PDA) tinggi ari Ordinan Perlombongan Minyak (OMO),” ku iya.
Malik mega madah Sarawak nadai madah PDA nyadi enda sah tang nyemetak madah iya enda dikena ba Sarawak.
“Sida semina nyebut PDA enda ulih kena ba Sarawak, tu mih ti dipechara. Kenyau 1974 semina bisi siti skim pengintu tunggal (PDA) lalu 2018 sida (Sarawak) ngaga peminta.
“Ari penemu aku kediri, iya ukai utai ke ulih diputarka kort tinggi tang bepelasarka nama ke disebut kort,” ku iya.
Malik madah Sarawak nyemetak nyebut OMO endang undang-undang ke sah lalu Sarawak bisi hak neritka undang-undang nya.
“(Tang) Kami madah kuasa ngintu enggau nyaga aktiviti pemungkal reti nya nyerungkai enggau nguasa minyak endang utai ke dibaruh bidang kuasa parlimen. Nyema nya amat, reti nya perintah nadai kuasa deka neritka adat.
“Lebih agi beratika bidang minyak enggau minyak ke lenyau ba perintah besai semina parlimen aja ke ulih ngaga undang-undang.
“Nama ke disebut Sarawak iya nya, OMO ukai undang-undang ke bekaul enggau bidang minyak enggau gis,” ku iya.
Udah nya, Penyanding Penemu Undang-undang Sarawak Dato Sri JC Fong nyemetak madah kes nya ukai semina pasal ngelaban parlimen tauka kaunsil undang-undang Sarawak dalam ngaga undang-undang.
“Petronas meseti ba baruh konstitusyen, Parlimen ngembuan kuasa eksklusif ngaga undang-undang bekaul aktiviti pemungkal petroleum.
“Isu tu ukai dalam bidang kuasa Kory Perintah Besai alai ngaga pemtutus, iya endang perati akim enggau Kort Tinggi,” ku iya.
JC Fong madah OMO 1958 endang undang-undang dikemendarka Kaunsil Nengeri sebedau Malaysia ditumbuh.
“Pengudah bisi Malaysia, atur nya mengkang dikena nyadi undang-undang ke diguna lalu semina sah ba Sarawak,” ku iya.
OMO, ku iya, ukai pasal minyak enggau palan ngiga minyak. Iya bekaul enggau pengawa ngintu enggau nyerungkai sereta nguasa petroleum di Sarawak.
“OMO mungkur semua aktiviti ba tebing tasik enggau pelantar benua. Nyadi, jaku simpul iya, Petronas patut nitih undang-undang nengeri lebih agi dalam OMO enggau Kanun Tanah Sarawak,” ku iya.
Kelimpah ari JC Fong, raban luyar Sarawak nyengkaum Luyar Besai Nengeri Sarawak Datuk Talat Mahmood Abdul Rashid, sapit iya Saferi Ali enggau pemesai undang-undang nengeri Mohd Adzrul Azlan.
Udah nya, Malik dibantu Khoo Suk Chyi enggau Surendra Ananth.