MIRI: Pemayuh daya idup raban bansa ti dikemeran di Sarawak chukup ngemegah ati, kelebih agi di bagi menau tu, Kaban Parlimen (MP) Miri, Dr Micheal Teo, enda muai awak ngemeranka adat asal sida ngaga asi tuchong ba mua opis servis iya ditu, kemari.
Pengawa tu mega nyadi sebagi tauka kelai Festival Bot Naga, siti ari pengerami asal raban bansa China, ti diintu kemari.
“Dipeda baka muntang tang ke amat enda ngemuntang nya,” ku Dr Teo ti bela ngujika pengelandik diri nungkus asi tuchong nitihka ajar siku ari kaban PKR ti megai pengarap Islam.
Tu asi tuchong ti ‘halal’ digaga ari asi pulut, digulai dagin lembu enggau kachang tanah, disedia nyerumba pengerami sehari nya lalu udah nya disadung ngagai mensia mayuh ke bisi bejalai mansa.
Nitih ku Sekretari Politik Dr Teo, Voon Siak Ni, sepenyampau 100 tungkus asi tuchong ti ‘halal’ udah digaga lalu disadung ngagai raban Islam enggau bala bukai.
“Tu awak chukup engkeman dikena mantaika adat asal tauka Festival Bot Naga raban bansa China ngagai mensia mayuh ti apin nemu silik agi pasal lagenda enggau festival bot naga tu.
“Pekara ti ngasuh ati rindu agi iya nya asi tuchong tu digaga bala kaban ti megai pengarap Islam lalu tu ngayanka pengawa begulaika budaya, bela mereti sereta bebasaka pangan diri,” ku iya nerang.