SARIKEI: Kaban Kunsil Nengeri (ADUN) Repok, Dato Sri Huang Tiong Si nyemetak madah diri setuju enggau penyerakup raban bansa deka mai menua tu meruan likun sereta pupu bansa idup berakup.
Ku iya, rayat meseti seruran beserakup enggau nyingkang mansang ke mua nyadi tim ti tegap.
“Pemanah enggau pengerapit kaul raban bansa nyadi pugu pekara besai ba pengawa nempa gaya rampa ti tegap enggau kondusif.
“Enti kitai berati kemaya hari tu, kitai ngintu tetiap hari besai ti diintu tetiap raban bansa ti diau di menua enggau pengelantang sereta pemaik lalu bela meri awak ngagai bansa bukai ti bebida etnik enggau pengarap ngasaika pengerami ti diintu.
“Nadai berasai sanggu, nadai penangi enggau richah diintu ba tetiap aktiviti bisi diatur, tu udah nyata ngayanka penyerakup menua kitai teguh amat,” ku iya.
Iya mansutka jaku nya nengah pengari iya, Chairman Kaunsil Pelilih Sarikei, Wong Zee Ying lebuh ngabang Hari Raya Aidilfitri ngagai beberapa rumah bala staf gawa perintah enggau bala komuniti di menua nya, kemari.
Antara rumah ti udah digusung sida sebuat iya nya rumah Temenggong Hajah Junia Olia, rumah Pemangku Pemesai Pelilih Sarikei, Baijuri Bidin sereta beberapa buah rumah bala komuniti bukai.
Nitih ku Huang, pengawa ngempung budaya enggau pekara rama ti udah lama dikemeran raban bansa Melayu, Iban, Bidayuh enggau bansa bukai udah ngayanka komuniti Malaysia pupu bansa ti idup dalam pengelantang.
“Rayat Malaysia patut beterimah kasih enggau ngenang penyelai ba pengelain budaya ti dikunsi di menua tu.
“Penegap enggau pengelantang ti diasai asil ari kerejasama semua bansa ke alai tetiap hari besai etnik di menua tu diintu begulai dalam pengelikun,” tandu iya.