MIRI: Sehari tu, 18 Jun, raban bansa China deka ngintu Dragon Boat Festival tauka DuanWu Festival ti suah diintu kena hari kelima ari bulan lima ba kalender taun China ninting taun.
Seraya jeman moden enggau muntang ngulihka pemakai, mensia mayuh nadai agi nganti dataika hari besai makai asi tuchong (tauka ZhongZi), mayuh bansa asi tuchong bisi dijual meri mensia mayuh awak nyepi asi tuchong ti bebida asai.
The Borneo Post bisi ngerandau siku tukang masak, Sin Yean Yean, ti bekunsika sekeda chara ngaga asi tuchong ti disumai iya taun tu, mayuh ari sida nya dikumbai asi tuchong ti manahka pengerai.
“Barang maya orang bejaku pasal asi tuchong, isi pemakai ti suah dikena nyumai iya ngaul berau pulut enggau bansa pemakai bukai sereta rempah baka dagin mata, undang rangkai, kulat rangkai enggau ke bukai.
“Ba dunya kemaya hari, mensia mayuh majak nemu pasal bepakaika pemakai bepengerai. Sekeda ari sida ti bepengerai nyangka enda entu ngasuh diri makai berau pulut laban iya begunaka timpuh lama bebali (digest). Nya alai, aku nguji ngasilka multigrain ti begulaika berau pulut enggau multigrain.
“Taja aku ukai profesional ba pekara nutrisi pemakai, tang aku mayuh macha pasal pekara tu, lalu dikena ngamatka berau ‘multigrain rice’ ngundan fiber enggau ai mineral baka magnesium, copper enggau iron ke alai nutrient tu mantu tubuh ngintu gelung perut meruan agi sereta mantu metabolism tubuh,” ku Sin.
Pia mega ku Sin, asi tuchong multigrain mayuh peminta ari bala bakih enggau pelanggan iya taun tu, begulai enggau asai ke bukai.
Jalai mela ti digubah iya enggau bantu ari bakih, nyengkaum kemping, bali, gandum mirah, kachang kuda, kulat, undang rangkai enggau dagin.
Belalauka pengingin iya ngasilka asi tuchong ti manahka pengerai, Sin enda bekenaka biching ti jampat ngubah asai, iya nyilih enggau gula pirang enggau garam alus.
“Aku ngena gula pirang ari gula pasir laban gula pirang tu kurang agi manis iya tang tau mantu nambahka asai,” ku iya.
Penyamai asi multigrain ti diasuh Sin sepi, asi tuchong nyamai agi ari asi tuchong ke ngelama tu.
Asi tuchong bukai ti disumai iya mega mayuh peminta taun tu iya nya Asi Tuchong Nyonya, Asi Tuchong Lapan Reta, Asi Tuchong Dagin Kulat, Asi Tuchong Paste Kachang Mirah, Asi Tuchong Sausage China, Asi Tuchong Abalone enggau Asi Tuchong Kachang Ijau.
Asi Tuchong Abalone ku iya, iya nya asi tuchong pemadu mar rega ti disumai iya laban iya ngena barang datai ari Afrika Selatan begulai enggau sekeda barang ari Jipun enggau undang rangkai.
Bekunsika pejalai asi tuchong iya, ku Sin, iya udah nagit ninting taun ngambika nguji diri ngaga jalai mela asi tuchong baru, ke alai iya suah agi ngaga ungkup diri sebilik ngambika nguji ngasai.
“Taun tu, bakih aku tauka orang ti dikelala deka meli tu ari aku, aku semina ngaga ungkup peminta khas aja,” ku Sin.
Kandang 12 hari, Sin udah ngasil lalu nyual 1,500 asi tuchong bemacham bansa.
“Aku udah ngetu nyumai tu, laban aku gawa kediri aja. Kelalu lama bediri enggau nyumai begunaka pengerai aku mega, nya alai aku minta ampun ngagai sida ti ngandalka asi tuchong digaga aku,” ku Sin.