Anda di sini

GPS patut belajar ari pengilap suba: Jeniri

KUCHING: Gempung baru nengeri, Gabungan Parti Sarawak (GPS) deka belajar ari pengilap dulu suba lalu ngemanahka pengurang enggau pengelemi Barisan Nasional (BN) dikena nentuka penengkeman dalam politik nengeri tu.  

Penganalisis politik ari Universiti Malaysia Sarawak (Unimas), Assoc Prof Dr Jeniri Amir madahka pengawa numbuhka GPS ti diari Parti Pesaka Bumiputera Bersatu (PBB),  Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP) ukai pekara nengenyitka ati.

“BN Sarawak enda ulih agi begulai enggau gempung BN besai laban diatu dibalut skandal enggau penanggul ti ngujungka alah ba pengawa bepilih besai tu tadi,” ku iya.

“Nya alai BN nengeri patut ngiga pelasar baru enggau ngubah juluk sebedau betapi enggau pupu bansa maya pengawa bepilih nengeri ila,” ku iya.

Ku iya, pengawa deka numbuh enggau nyemilik GPS mega dikena empat komponen nampung pengawa ditegika sida.

Pengudah bepilih besai 9 Mei, BN Sarawak nyadi penyakal ba renggat perintah besai tang meruan megai perintah ba renggat nengeri.

Pakatan Harapan diatu megai perintah besai.

Maya pengawa bepilih nengeri dalam taun 2016, BN nengeri menang 72 ari 82 penuduk nengeri.

Semina Sarawak aja nengeri dalam Malaysia ti ngatur pengawa bepilih nengeri ngatika diri.

Maya pengawa bepilih parlimen tu tadi, BN Sarawak menang 19 ari 31 penuduk tang tu enda chukup dikena nyaup BN ngetanka kuasa ba renggat perintah besai.

BN semina menang 79 penuduk parlimen ari 222 ti diperebut.

Ku Jeniri,GPS meseti anang meda diri empu semina diberi chap baru enggau bebali nama aja ,tang meseti mega antara pekara bukai ngubah , pengawa besai ti ditegi enggau semengat dikena nentuka ulih matak pengundi sereta ngetanka bala penyukung.

Tranformasyen iya meseti holistik enggau meseti kemerah agi ngaul rayat ari sebedau tu, ku Jeniri.