Anda di sini

GPS ditumbuh ketegal beratka rayat Sarawak

Advertisement

KUCHING: Presiden Parti Rakyat Bersatu Sarawak (SUPP) Datuk Prof Dr Sim Kui Hian bepenemu empat parti ti numbuhka Gabungan Parti Sarawak (GPS) nunjukka parti bebendar ngiga chara pemadu manah ti beratka utai ke diguna bepelasarka rayat Sarawak.

“Pekara besai ke digaga kitai sehari tu (ensanus) iya nya pansut ari Barisan Nasional (BN) lalu numbuhka gempung parti baru iya nya GPS, pekara silik bekaul enggau tu deka diputuska ila nyengkaum struktur, logo sereta lagu.

“Nama ke pemadu beguna iya nya polisi GPS ti lebih beratka rayat enggau pekara ke diguna Sarawak.

“Udah nya ila kitai deka nerangka polisi GPS ngagai semua kaban di serata nengeri tu. Laban baka SUPP ukai semina aku aja ngempu tang semua kaban parti ngempu lalu tu pulai ngagai aum delegasyen endur kitai deka nerangka pekara tu enggau silik sereta nama ke patut,” ku iya.

Menteri Kaunsil Kandang menua enggau Pengawa Berumah nya mansutka penemu iya lebuh dikerandau pengarang berita pengudah sama enggau baumka pasal pemutus nya ti diketuaika Kepala Menteri ti mega Presiden Parti Pesaka Bumiputera Bersatu (PBB) Datuk Patinggi Abang Johari, ensanus.

Ba aum pengarang berita pengudah tembu baum Majlis Teritnggi BN Sarawak ke penudi entara empat komponen parti nya ke diatur ba Indu Opis PBB, Abang Johari madahka PBB, SUPP, Parti Rakyat Bersatu Sarawak (SUPP) enggau Parti Demokrtik Progresif (PDP) pansut ari BN lalu numbuhka GPS.

Kelimpah ari nya Dr sim lebuh ditanya bekaul enggau Parti Rakyat Bersatu (UPP) nyema dibai tama dalam GPS, iya bepenemu sturuktur pemun dipasuk empat parti komponen nya.

tambah mega ku iya UPP enggau SUPP agi bisi Sempekat Pemereti Ati (MoU) ke udah disain sebedau tu, tang enda nulak parti bukai ke bisi ati deka masuk dalam GPS ke pemerat nengeri tu, lebih agi bekaul enggau ngambi pulai baru hak Sarawak dalam Sempekat Malaysia 1963 (MA63).

“Empat parti komponen dalam tu dikena ngepunka lalu aku pechaya ti pemadu beguna diatu ba GPS ngemupuruka polisi ti lebih bepelasarka rayat nengeri tu sereta beratka Sarawak

“Sarawak patut lebih beserakup ari ke udah lalu kami seruran ngelaluka penatai parti bukai ukai semina UPP aja tang enda ngira bagi rayat Sarawak asal aja ngembuan pemerat  enggau tuju ti sama, sida tau masuk GPS,” ku iya.

  • oleh
  • Advertisement