KUCHING: Pemutus numbuhka Gabungan Parti Sarawak (GPS) pengudah pansut ari Barisan Basional (BN) dipelaba disukung sereta diterima penyukung tauka pengundi empat parti nyengkaum Parti Demokratik Progresif (PDP).
Presiden PDP, Datuk Seri Tiong King Sing madah laban tuju penumbuh serakup parti nya dikena ngetan sereta nyaga hak Sarawak.
“Kitai ti numbuhka serakup parti ti bepalan ba Sarawak lalu nengah tu kitai nguji enggau naka ulih ngetan sereta nyaga hak Sarawak ke meri penguntung ngagai rayat sereta pemerat nengeri.
“Nya alai aku ngasaika penyukung tauka pengundi ba tetiap sitak tauka kaban PDP, sida setuju sereta meri sukung penuh ngagai tu (penumbuh GPS),” ku Tiong meri penerang pandak lebuh dikerandau raban pengarang berita.
Dulu ari nya, Tiong ti mega Kaban Parlimen Bintulu ngulu aum ke diatur urung dua jam berengkah pukul 10 pagi, Aum Kaunsil Tetinggi BN Sarawak ti ke penudi ti bechairmanka Kepala Menteri ti mega Presiden Parti Pesaka Bumiputera Bersatu (PBB) Datuk Patinggi Abang Johari Tun Openg ba Indu Opis PBB ditu, kemari.
Maya baum nya semua empat parti PBB, PDP, SUPP PRS ti digulu semua presiden, sapit presiden sereta sekretari besai parti selubang penemu pansut ari BN sereta numbuhka GPS.
Pemutus nya digaga bepelasarka ubah pemansang politik diatu kelebih agi pengudah pemutus Pengawa Bepilih Besai Ke-14 (PRU14) apin lama.
Ba pemutus PRU14, BN Sarawak menang 19 sitak parlimen nyengkaum 13 sitak diarika PBB, tiga sitak (PRS), dua sitak (PDP) enggau SUPP menang ba siti sitak parlimen.
Ari empat sitak ke diberi parti tu iya nya Parlimen Mas Gading, Saratok, Bintulu enggau Parlimen Baram. Tiong empu mujur ngetanka sitak Parlimen Bintulu enggau ba Parlimen Baram ti diarika anyi Ngau.