Anda di sini

GPS deka bekerejasama enggau Peritah Besai tang ukai nyemilik PH

 Fatimah lebuh dikerandau raban pengarang berita, kemari.
PEMUTUS KE BERAT: Fatimah lebuh dikerandau raban pengarang berita, kemari.

KUCHING: Gempung parti baru bepalan ba Sarawak, Gabungan Parti Sarawak (GPS) deka nempa kerejasama enggau Perintah Besai Pakatan Harapan (PH), ukai nyemilik PH.

Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit ti mega Ketuai Raban Indu Parti Pesaka Bumiputera (PBB), Dato Sri Fatimah Abdullah madahka kerejasama nya deka lebih beratka hak enggau pemerat rayat enggau nengeri bekaul enggau Sempekat Malaysia 1963 (MA63).

“Pemutus tu amat beguna ke penguntung rayat iya nya kitai GPS deka nempa kerejasama ungkup pemerat enggau hak rayat enggau nengeri, lalu nyemilik PH.

“Kitai bekekerajasama laban kitai agi dalam Malaysia, Gempung Malaysia reti iya Perintah Besai patut meda utai ke diguna sereta dikedeka rayat kitai ba Sarawak.

“Kitai negika hak kitai dalam MA63 ambika banding bekaul enggau Petronas, kitai ke bendar iya minta hak kitai lebuh kitai numbuhka Malaysia ke endang udah terang dalam MA63,” ku iya.

Fatimah mansutka pekara nya lebuh dikerandau raban pengarang berita bekaul enggau empat parti iya nya PBB, Parti Rakyat Sarawak (PRS), Parti Sa’ati Rakyat Sarawak (SUPP) enggau Parti Demokratik Progresif (PDP) ti pansut ari Barisan Nasional (BN) lalu numbuhka gempung baru parti ti bepalan ba nengeri tu, iya nya GPS.

Pemutus nya dibantaika Kepala Menteri ti mega Presiden PBB Datuk Patinggi Abang Johari dalam aum pengarang berita, ba Indu Opis PBB ditu, kemari.

Dulu ari nya Fatimah ngulu Aum Kaunsil Te tinggi BN Sarawak ti ke penudi, ke diatur ba Indu Opis PBB kemari.

Ngenang pansut ari BN, iya madahka pemutus nya ti pemadu berat digaga tang bepelasarka gaya politik enggau peneka parti, pemutus nya enda tau enda dipejalaika.

“Udah tentu pemutus tu amat berat sereta pemutus ti pragmatik, pengelama udah begulai enggau BN tang kitai enggai nyadi enda ninggalka BN ketegal gaya politik diatu lalu numbuhka GPS, disema baka laki bini ke udah lama jadi tang enda ulih sarak.

“Laban ketegal gaya politik diatu udah berubah ti minta kitai iya nya negika hak kitai enggau pemerat rayat.

“Baka ke dipadah YAB Kepala Menteri Datuk Patinggi Abang Johari Tun Openg, kitai beterima kasih ngagai BN ke pemanah enggau pemeri ngagai nengeri enggau rayat Sarawak ngelama tu,” ku iya seraya madahka nya entara pekara dikerandau enggau pengari empat parti ke diarika presiden, sapit presiden enggau sekretari besai parti.

Pekara ti mega dikemeratka dalam aum ku Fatimah, Sarawak mega patut beratka pemayuh pupu bansa, jalai pengarap enggau gaya rampa menua kelimpah ari hak dalam MA63.