KUCHING: Perintah Sarawak diatu berengkah enggau platform politik baru iya numbuhka Gabungan Parti Sarawak (GPS) pengudah pansut ari Barisan Nasional (BN), kemari.
Kepala Menteri ti mega Presiden Parti Pesaka Bumiputera Bersatu Sarawak (PBB), Datuk Patinggi Abang Johari Tun Openg madahka pemutus nya digaga empat parti iya nya PBB, Parti Sa’ati Rakyat Sarawak (SUPP), Parti Rakyat Sarawak (PRS) enggau Parti Demokratik Progresif (PDP).
Iya madahka pemutus nya berengkah kemari, pengudah berandau sereta berundingka mayuh pekara bekaul enggau pemansang politik menua pengudah Pengawa Bepilih Besai Ke-14 (PRU14).
“Parti Komponen BN Sarawak iya nya PBB, SUPP, PRS enggau PDP udah selubang penemu ngaga pemutus ninggalka BN lalu numbuhka gempung baru parti ti bepalan ba nengeri tu dikelala enggau nama Gabungan Parti Sarawak (GPS).
“Kami pechaya udah datai ba maya ke patut sereta senipak enggau Nengeri Sarawak berengkah ngena platform politik baru dikena napi pemar setipak enggau juluk, peminta enggau peneka penyampau tubuh rayat nengeri ke chukup besai.
“Gempung baru tu deka meri peluang ngagai kami mekuh ngagai pemerat Sarawak enggau hak Sarawak bepelasarka Sempekat Malaysia 1963 (MA63),” ku iya.
Abang Johari mansutka pekara nya dalam aum pengarang berita ke diatur ba Indu Opis PBB ditu, kemari.
Dulu ari nya Abang Johari nyadi chairman Aum Kaunsil Tetinggi BN Sarawak ti ke penudi, ke sama bisi digulu semua Presiden Parti iya nya Tan Sri Datuk Amar James Jemut Masing (PRS); Datuk Prof Dr. Sim Kui Hian (SUPP) enggau Datuk Seri Tiong King Sing (PDP).
“Kami arap bendar, tu pemutus ti pemadu pragmatik sereta senipak bendar mai Sarawak nuju ‘era’ baru ti dikedeka rayat Sarawak.
“Kami pechaya penumbuh gempung baru tu kitai deka ulih ngenegapka servis kami ngagai rayat enggau kelebih engkeman dikena nyapai juluk enggau peneka rayat Sarawak,” ku Abang Johari.
Beduduk ari Sarawak ke chukup nyelai, iya nya mayuh adat enggau main asal, pupu bansa enggau mayuh jalai pengarap, iya madahka nengeri ke nyadi aset besai di Malaysia ke lalu nyadi menua lantang, maju sereta nyulut, endang patut rayat Sarawak terus ngetan enggau nyaga pengaya nya, idup dalam pemaik enggau pengelantang begulai enggau pangan diri.
Perintah Sarawak ku iya, deka terus nyaga enggau ngetanka pemerat semua rayat enda ngira pemayuh tubuh enggau penuh inklusif.
Nya alai pemutus ke digaga tu endang ke pemerat rayat enggau Nengeri Sarawak, ku iya.
“GPS deka nempa kerejasama enggau Perintah Besai ke pemerat menua sereta hak enggau nengeri bepelasarka Konstitusyen Perintah Besai enggau Gempung Malaysia,” ku iya.
Kelimpah ari nya, lebuh ditanya raban pengarang berita sekalika GPS deka mai UPP masuk serakup nya, Abang Johari madahka pekara nya dudi.
“Laban kitai deka dulu netapka dulu gempung. Udah tembu netapka kitai (GPS) deka madah ngagai speaker Kunsil Nengeri, Opis Pengerejista Gerempung, Dewan Rakyat sereta mega madah ngagai BN.
Ditanya sekalika 19 Kaban Parlimen ari Sarawak tu deka nyadi penyakal tauka nyereta PH, Abang Johari madah;
“Aku nulis surat sekretari Dewan Rakyat, udah nya bepanggai ba Dewan. Nya pemutus sida ukai pemutus kitai.
Abang Johari berebak enggau beterima kasih ngagai BN dalam semua pekara ke dipejalaika sereta dibai ngagai nengeri pengelama dalam komponen BN.
Iya bepenemu, nengeri tu patut berubah bepelasar pekara ke nyadi diatu.
“Kitai beterima kasih ngagai BN. Kitai berengkah enggau Sarawak Alliance udah nya ditangkanka BN lalu diatu landskap kitai lain, kitai baru aja ngemansangka menua, tang diatu udah berubah.
“Kitai menang (ba pengawa bepilih) ba taun 2016 laban kitai deka negika hak Sarawak, inisiatif Tok Nan lalu kitai nampung nyaga sereta ngetan hak dalam MA63, tu mega pengawa ke dikereja sereta dipekuhka kitai diatu,” ku iya.
Sama bisi enggau baum sereta ngulu aum pengarang berita kemari Sapit Presiden Parti, Datuk Amar Douglas Uggah Embas enggau Datuk Amar Awang Tengah Ali Hasan (PBB); Datuk seri Richard Riot Jaem (SUPP), Datuk Nelson Ballang Rining (PDP) lalu Sekretari Besai Parti Datuk Alexander Nanta Linggi (PBB), Datuk Joseph Salang Gandum (PRS), Datuk Sebastian Ting (SUPP) enggau Datuk Nogeh Gombek (PDP) lalu kelimpah ari nya Dato Sri Fatimah Abdullah, Ketuai Raban Indu PBB.