TENOM: Nakapanau oh kopointalangan karait do toguangon Kounsol Kakadaian Tenom (MDT) hiti di tadau baino montok pinopoilo kokomoi do bontolon koupisan dilo montok monoguang manaak kounalan kumaa mogigiyon ngawi di kohompit.
Minoboros ih Puru Parlimen Tenom, Norita Sual do kinopointalangan dilo nopo nga pinolombus di Panakadai Montiri Koporintaan Kinoiyonon om Pomulominan, George Hiew.
“Kopointalangan dilo nopo nga manaak ralan tonudon kumaa surupu ngawi do kounsol montok monoguang mogihum do ontodon kousinan om nogi monumboyo koburu-buruon do mogigiyon ngawi di kohompit mambarai sukai,” ka di Norita.
Kopointalangan dilo nopo nga nakapanau hilo id linimput mitingan do MDT id somok do upis watas ih pointoguang po nogi do kompleks sipoot watas hiti.
Poingampai nogi potindapou ih momuruan parti DAP Kemabong, Chong Shui Sang tu isio po nogi kawagu oh upisor pionitan parlimen Tenom.
Nokotindapou nogi ngawi oh toinsanan surupu do MDT di koniab kaampai no momuruan ngawi do kounsol dilo.
Ih Norita nopo nga pinoingkat do DAP id watas Parlimen Tenom di ontok pomilian tagayo nakatalib miampai nakamanang minangala di pinoingkakat do Umno-BN, Datuk Rubin Balang.