MIRI: Pengawa bebuka puasa begulai ulih negutka kaul penyerakup entara rayat pupu bansa di nengeri tu.
Menteri Muda Dagang Temuai, Seni enggau Main Asal Datul Lee Kim Shin madahka pengawa ti bansa tu ngembuan penyelai sereta patut diangkat lalu ditegi.
“Pengawa bansa tu ti nyadika Sarawak ngembuan penyelai. Ulah ti bebasaka pangan diri enda ngira jalai pengarap, ngintu pengerami begulai nya mih ti nyadi pengering ke dikembuan rayat Sarawak,” ku Lee nandu.
Iya madahka pekara nya ngagai pengarang berita lebuh ti ngulu pengerami bebuka puasa enggau Ketuai Kaum lemai kemari.
Lee ke mega Kaban Kunsil Nengeri (ADUN) Senadin madahka penyerakup enggau pengelantang raban bansa ke nyadi pekara pemun pemansang rayat enggau nengeri Sarawak ti patut dikemerat.
“Anang ngasuh kitai terunda enggau pekara negatif. Nanka pemanah sereta main asal rayat Sarawak. Nya utai ti berega,” ku Lee nandu.
Sama bisi datai iya nya MP Sibuti Lukanisman Awang Sauni, ADUN Piasau Datuk Sebastian Ting, Datuk Bandar Miri Adam Yii, Pemesai Pelilih Abdul Aziz Moh Yusuf enggau Temenggong Abdul Rahman Fazail.