SIBU: Pemangat ujan pagi kemari ba Palan Penyangkai Ekspres Sibu enda nanggul mensia mayuh ti ngintu pengerami sereta ke pulai pemisi ngagai menua diri.
Tu nyata ulih dipeda nengah mayuh pejalai tambah digaga kemari enti dibanding enggau Hari Enam, dikena nangkup peminta ari mensia mayuh.
Sapit Kontroler Kaunsil Sungai Sarawak (SRB) Sibu (Sitak II) Hatta Morshidi madahka bisi lima buah bot tambah ke udah dikemendar ungkup pejalai Sektor Sibu/Kapit kena ke ngalih hari kemari.
Kami ngeletakka sepuluh pejalai tambah (nyengkaum lima ke udah dikemendar dulu agi ari nya) naka ke saritu,” ku iya seraya nambah bisi tiga pejalai tambah ti udah dikemendar kena Hari Enam tu tadi.
Nitihku Hatta, palan penyangkai nya udah ngatur pejalai 3,449 iku orang tambang kenaka Hari Enam, seraya lalu palan penyangkai RC ba Jalai Khoo Peng Loong ditu bisi nerima 985 iku orang tambang.
Ku iya nambah, ari 3,449 iku orang tambang nya, sida ke ngejang ari palan penyangkai nya bisi 1,977 iku lalu orang tambang ke datai ke palan penyangkai nya bisi 1,472 iku.
Bekaul pekara tu, Hatta madahka ari pansik iya orang tambang ti bekejang ari palan penyangkai majak mayuh seraya sida ke datai ngagai palan penyangkai nya bisi kurang.
“Tu reti nya mayuh sida ti mulai kediri ke menua ba Song enggau Kapit laban pengerami enda lama agi ka diintu,” ku iya.
Sentang tanya atur pejalai ke ditukar maya nya kemari iya nya laban gaya mua ari ti enda entu manah, tang nadai bisi nanggul orang bukai ku iya.
“Semua bot bejalai nitihka maya ke udah ditetapka,” ku iya seraya ngelalau ngambi seruran ngemeratka pengelikun.
“Lalau aku ngagai bala juragan, berindik ari gaya mua hari ti enda tentu manah, kita meseti semampai likun lalu nentuka semua kereban pengelikun dalam ekspres agi manah.
“Sida mega dipinta seruran beratika agang sereta kayu batang ti melepu ba sungai,” ku Hatta.
Beserimbai enggau nya, diatu udah bisi tusun ti manah sereta sistematik ungkup orang tambang ba palan penyangkai nya.
Orang tambang mega dikangau sereta ditangkan nengah PA sistem ngambika enda nejuka barang sida pia aja.
Operasyen Pengerami Gawai Dayak ti keterubah deka digaga kena 25 nyentukka 31 Mei, seraya renggat kedua iya nya digaga kena 8 nyentukka 10 Jun.
Tu mega bisi ngaul ejensi kebukai baka polis, polis marin, Opis Marin Sarawak, Raban Pengintu Pengelikun Periman (APM), RELA, Opis Menteri Dagang Domestik, KPDNKK enggau MMEA.