SIBU: Raban bansa Dayak diperansang numbuhka dagang ngambika bisi nyadika batang penatai pemisi ti ulih ditampung dataika serak dudi.
Sekretari Politik Kepala Menteri Romeo Christopher Tegong madah, taja pia dagang nya meseti dikereja enggau ransing tang ukai diudahka pia aja.
“Ketegal nya kitai meseti liat ati enti deka muka dagang sereta ngembuan timpai penemu ke jauh.
“Dagang tu ulih nyadika penatai pemisi ti manah enti kitai bebendar nyentukka tau ditampung anak uchu kitai dudi hari ila,” pia ku iya maya bejadi Share Via D’Village Cafe ditu, malam kilah ensana.
Pengerami nya bela digulu Penghulu Evelyn Holly Sebom enggau orang ti beempu cafe, Beby Kropet.
Romeo madah, diatu udah maya iya alai bansa Dayak ngubah runding sida ba pengawa dagang, ukai agi ngena chara lama suba.
“Ambika banding kita tau bekenaka teknologi maya hari tu dikena ngerembai sereta ngemesaika dagang kita.
“Anang ngena chara lama, duduk aja nganti orang datai,” ku iya madah baru.
Ku Romeo, runding ti kreatif bela nentuka pemujur sesebengkah dagang.
“Semampai nerenakka runding baka ni ngemanahka agi dagang kita taja semua kitai nemu dagang tu bisi maya untung bisi mega rugi tang nadai salah enti kita bebuaika belanja mimit ngiga chara matak penatai orang mayuh.
“Semua tu randaka kitai enda ulih ngelarika diri ari napi penguji ti mega tau bendar nyadika pengering kitai nuju pemujur enggau pemansang jemah ila,” pia ku iya madah.
Pengawa bejadika cafe nya bela dirichahka enggau program pemerindang ari Nightstreet Band ti betuaika penanyi tebilang Iban, Stevenson.