SRI AMAN: Kaban Komiti Pemansang enggau Pengelikun Genturung Pendiau (JKKK) di nengeri tu dipinta regas agi nitihka pemansang kemaya hari.
Menteri Muda Pengelantang Komuniti Sarawak, Datuk Francis Harden Hollis madah genap JKKK patut bebendar sereta bekerejasama enggau pangan diri dalam ngemansangka genturung pendiau tauka rumah panjai diri.
“Perintah nengeri ngarap kerejasama entara kaban JKKK enggau ketuai di menua tu mengkang bisi dikena ngemansang sitak diri empu udah tu.
“Tu endang dikena nentuka genap genturung pendiau enggau rumah panjai kitai di nengeri tu mansang sebaka enggau pemansang kemaya hari,” ku iya.
Harden ke mega Kaban Kunsil Nengeri (ADUN) Simanggang madha munyi nya rambau bejadika Pengerami Mantar Gawai 2018 diatur JKKK Kampung Desa Indah, Sri Jaya bepalan ba Dewan Suarah ditu malam ensana.
Ngelansa pasal pengerami nya, Harden mega nangkan raban bansa Dayak ke ngintu pengerami taun tu patut ngerami nya enggau penuh basa sereta enda kelalu besai.
“Intu pengerami tu enggau penuh asai terima kasih lalu seliahka kelalu rua laban nya deka ngenataika pengerugi ngagai semua kitai.
“Beli mih barang nitihka pengulih diri empu anang kelalu rua enggau belanja sampai nyau ngenataika pengerugi ngagai diri empu,” ku iya nerang silik.
Sama bisi datai ba pengerami nya, Chairman JKKK Deniel Sidi, Chairperson Biro Indu, Rebecca Pandie sereta bala bukai.
Ba pengerami nya, Harden bisi ngungkupka agih belanja ungkup taun 2019 penyampau RM5,000 ngagai JKKK enggau RM3,000 dikena bejalaika aktiviti sepanjai taun sida.