PETALING JAYA : Menteri Besai Tun Dr Mahathir Mohamad kemari madahka iya deka megai portfolio Menteri Pelajar dalam kabinet baru perintah Bejaku ngagai pemberita udah aum kaunsil presiden Pakatan Harapan ditu, iya mega madahka Datuk Seri Dr Wan Azizah Wan Ismail, Presiden PKR ke mega sapit menteri besai deka diberi portfolio Menteri Pekara Orang Indu enggau Pengintu Pengelantang Pendiau.
Sebedau tu, Presiden Pribumi Bersatu Malaysia (PPBM) Tan Sri Muhyiddin Yassin dichiri nyadi Menteri Dalam Menua, sekretari besai DAP Lim Guan Eng nyadi Menteri Pekara Wang lalu presiden Parti Amanah Negara (Amanah) Mohamad Sabu nyadi Menteri Penyaga Menua.
Ngelansa pasal pengawa iya ti deka ngiring opis menteri nya, Dr Mahathir madah: “Aku megai portfolio pelajar laban kelalu mayuh orang kurang pemandai di menua tu lalu kami patut fokus ngagai pekara nya.
Tambah mega, chara belajar kitai udah jauh tinggal jeman lalu kitai beguna chara baru belajar iya nya ngena komputer sereta teknologi bukai.”
Bepelasarka penerang nya, dua opis menteri khas ungkup pekara pelajar ke ditumbuh sebedau tu iya nya Opis Menteri Pelajar enggau Opis Menteri Pelajar Tinggi deka diserakup enda lama dalam Opis Menteri Pelajar.
Kenu ku Dr Mahathir, semua menteri ke dipadu naka tu nyengkaum lapan menteri ke deka dipadah dalam minggu tu deka ngangkat sumpah nyadi menteri kena Hari Satu minggu baru.
“Kami deka nguji nyiri 13 menteri ngangkat sumpah kena Hari Satu (21 Mei) nyema disetuju Istana,” ku iya.
Nangkan nya, lebuh dipinta ngelansa pasal pengelaun madahka sapa menteri ke bukai, Mahathir madah pengawa milih menteri begunaka bepikir enggau dalam.
“Kitai ngembuan empat parti dalam PH lalu genap parti ngembuan pengingin megai sesebengkah opis menteri lalu bisi mega beserak. Nya alai begunaka awak nentuka sapa orang ti engkeman megai opis menteri nya,” ku iya.
Taja pia, Dr Mahathir madah nadai bisi ulah ‘nepotisme’ dalam milih kaban kabinet. — Bernama