LAWAS: Sarawak terus nandu penemu diri deka terus bekerejasama enggau perintah besai ke diatu dipegai Pakatan Harapan (PH).
Sapit Kepala Menteri Datuk Amar Awang Tengah Ali Hasan ke emga Chairman Kaunsil Amanah Khairat Islam Lawas (LAKHIL) madah, taja Sarawak ukai sebagi ari PH, mayuh pengawa ke patut dipejalaika begulai.
“Kitai patut beterima kasih ngagai menua tu laban diatu udah diiring PH lalu tu endang pemutus ke udah digaga rayat.
“Taja Sarawakd iatu nengeri penyakal, kitai deka meri kerejasama enggau perintah besai ke diiring PH,” ku iya rambau Pengerami Nyuaka Pemeri Hari Raya Aidilfitri ngagai bala pemesai masjid enggau surau ditu, kemari.
Urung 67 penerima nyengkaum pengari masjid enggau surau di pelilih tu nerima pemeri ba pengerami nya.
Bela datai Residen Bagi Menua Limbang Ir Denny Ahmad Fauzi, Ketuai Tabung Baitulmal Limbang Junidi Lamat enggau temuai bukai.
Iya ke mega Menteri Pemansang Mengeri enggau Pengeraja Asal Kedua, Menteri Pemansang Industri enggau Pengawa Dagang Sarawak madah, Sarawak deka neruska pejalai pengawa ke diatur iya nya nyadi penyakal ke liat ati.
“Kepala Menteri Datuk Patinggi Abang Johari Tun Abang Openg deka nampung pengawa ke pemaik rayat nengeri tu seraraya nagih hak Sarawak.
“Perintah Besai mega ngembuan tanggungpengawa mantu rayat nyengkaum Sarawak bepelasarka undang-undang,” ku iya.
Awang Tengah madah, perintah nengeri mega deka matau semaya ke udah ditulis dalam manifesto PH ba PRU14 apin lama ke udah.
Berebak enggau nya, iya deka raban Islam ngemeranka ulah nyuaka pemeri ngagai raban ‘asnaf’ ngagai sida ti idup tusah.
Ku iya, sida ke bepemisi patut ngemeranka ulah siru laban nya endang diajar ba semua pengarap.