SIBU: Gerempung Bansa Dayak Sarawak (SDNU) Mukah ngarapka piak kaunsil kandang menua berundingka pematut nyiri penuduk Temenggong enggau Pemancha ungkup bansa Iban di Mukah.
Chairman iya Francis Atan madah, taja penyampau bansa tu minoriti di bagi menua tu, tang raban bansa Iban ditu bisi ngasaika penanggul laban nadai ketuai raban bansa ke ulih mutar penanggul ke ditapi sida iya.
“Penuduk Penghulu aja enda chukup laban kitai di Mukah tu laban bepelasarka tanggungpengawa ti nitih sitak dibanding enggau penuduk Temenggong tauka pemancha dipeda besai agi bungkur di bagi menua Mukah.
“Ba Mukah, raban bansa Iban bisi napi penanggul baka nadai taba pendam Dayak, Rumah SDNU Mukah enggau ke bukai laban nadai ‘orang’ ke patut ngenataika sebana sida ngelama tu.
“Nya alai, kami ba Mukah ngarap perintah berundingka peminta kami tu,” ku iya rambau Pengerami Mantar Gawai renggau menua Mukah di Dewan Mesra Mukah, apin lama ke udah.
Francis madah, taba pendam Dayak ke dilanggur sebedau tu iya nya sitak tanah bukit di sepiak kiba tauka kanan Jalai Mukah-Selangau nyentuk ke sitak Bukit Ambun enggau ke Ulu Kenyana.
“Perengka guna ke pemadu beguna ngagai rayat ditu lebuh maya ngejang ari dunya tu,’ ku iya.
Ungkup bajet ngaga Rumah SDNU Mukah, ku iya tu beguna amat ngambika komuniti ditu nyamai ngatur program-program ti bekaul enggau pesaka lama enggau adat.
Ngelansa pasal nyadi kaban tauka automatik raban bansa Dayak ke SDNU Mukah, Francis madag, komuniti tu enda ibuh agi ngisi pom tauka dipinta mayar yuran
“Semua peranak bansa Dayak ditu endang automatik nyadi kaban SDNU Mukah,” ku iya.
Berebak enggau nya, iya nesau komuniti Dayak di Mukah ngambi seruran ngemeratka penyerakup enggau pangan diri pia mega enggau bansa bukai.
Kenu ku iya, nengah semangat ‘Segulai Sejalai’ iya deka mantu raban bansa Iban di Mukah mutarka penanggul baka kes rabat enggau orang melah pinang patut dikereja begulai ngambika pengawa dikereja tau nyadi lempung.
Ba pengerami nya, SDNU Mukah bisi nyuaka insentif ngagai bala nembiak tauka anak kaban sida ke udah mujur bulih pemutus peresa ke manah ungkup taun nyin kemari.