Anda di sini

Langgur numbuhka gempung politik singkang pemadu manah

MASING
MASING

KUCHING: Langgur penemu ti deka numbuhka siti gempung politik entara parti komponen Barisan Nasional (BN) ti bepalan ba nengeri tu, endang singkang ke pemadu badas.

Presiden Parti Rakyat Sarawak (PRS) Tan Sri Datuk Amar James Jemut Masing madah, nya sebengkah ari chara tauka langgur penemu ke ulih dikena nyaga nengeri tu.

Nya alai, iya bepenemu manah amat enti gempung politik nya ditumbuhka sebedau pengawa bepilih ke deka datai.

“Numbuhka siti gempung politik entara parti komponen ba Sarawak (BN) dikena nyaga pemerat negeri Sarawak nya siti singkang ke pemadu badas.

“Manah agi enti ulih rintai gempung politik tu ditumbuh kena napi Pakatan Harapan (PH) enggau parti ke begulai enggau sida (PH), maya Pengawa Bepilih Kunsil Nengeri (PRN) 2021,” ku iya, kemari.

Masing ti mega Sapit Kepala Menteri mansutka pekara nya lebuh ti dipinta ngenang langgur penemu Chairman Barisan Nasional (BN) ti mega Presiden Parti Pesaka Bumiputera Bersatu (PBB) Datuk Patinggi Abang Johari Tun Openg ti dekaka parti beserakup nyadi pelasar parti komponen BN.

Kelimpah ari nya Masing bepenemu, langgur nya endang patut laban chap BN udah enda narit ati peranak tauka pemilih tauka pengundi.

Nambahka nya, Masing ngarapka aum bekaul enggau pekara nya ulih dikerandauka enggau lengkas.

“Chap BN nyau enda ulih agi narit ati tauka enda ulih dijual ngagai pengundi tauka pemilih ba Sarawak enggau Malaya.

“Ngarapka empat parti komponen BN Sarawak ulih betemu sereta berandau enda lama agi lalu ngiga chara dikena nuju insur ke manah manah.

“Aku mega deka berandauka langgur penemu tu enggau PRS,” ku iya.

Lemai ensanus, Abang Johari ti mega Kepala Menteri dalam aum pengarang pengudah baum Kaunsil Besai PBB madahka langgur penemu nya deka dikerandau dulu enggau parti komponen BN iya nya PBB, PRS, Parti Demokratik Progresif (PDP) enggau Parti Sa’ati Rakyat Sarawak (SUPP).

Langgur penemu tauka pemutus nya dipansutka beduduk ari BN ke udah alah ba Pengawa Bepilih Besai Ke-14 apin lama. Tang ba nengeri tu, BN Sarawak menang 19 ari 31 sitak parlimen.

Bisi tiga ari 19 sitak parlimen ke dimenang BN Sarawak, ke  dimenang PRS iya nya Parlimen Hulu Rajang, Parlimen Sri Aman enggau Parlimen Kanowit, lalu ke bukai, 13 iti dimenang PBB, PDP (2) enggau SUPP (1).

Tiga ari 6 parlimen ke diarika PRS iya nya Parlimen Lubok Antu enggau Parlimen Julau dirampas c halun Ngatika Diri enggau Parlimen Selangau dirampas Parti Keadilan Rakyat (PKR), maya pengawa bepilih apin lama.