Anda di sini

Perintah nengeri merambu deka ngatur IDECS baru ba taun 2019

KUCHING: Perintah nengeri merambu deka ngatur baru Aum Besai Ekonomi Digital Antarabansa Sarawak (IDECS) kali ke-3, ba taun 2019.

Pekara nya dipadahka Kepala Menteri Datuk Patinggi Abang Johari Tun Openg lebuh ke nutup pengerami IDECS 2018, kemari.

“Taun baru (2019) engka kitai bisi deka ngatur IDECS tang batang randau iya lain agi,” ku iya bejaku ba pengerami nya ke diatur ba BCCK ditu, lemai kemari.

Keterubah aum besai tu (IDECS) diatur ba taun 2017  lalu batang randau iya nya ngubah Sarawak nengah Ekonomi Digital enggau IDECS kedua (2018) mekuh ngagai Ekonomi Digital.

Ba pengerami tu kemari, Abang Johari  disempulang tiga iku Sapit Kepala Menteri Datuk Amar Douglas Uggah Embas, Tan Sri Datuk Amar James Jemut Masing enggau Datuk Amar Awang Tengah Ali Hassan.

Sama bisi datai Sekretari Perintah Nengeri Tan Sri Datuk Amar Mohamad Morshidi Abdul Ghani ngemataka semilan ti nyengkaum Memorandum Pemereti Ati (MoU) enggau Memorandum Sempekat (MoA) pengawa betukar sempekat ke udah disain nyerumba IDECS 2018.

Entara MoU ke disain iya nya pasal SarawakPay ti disain entara Lembaga Multimedai Sarawak (SMA) enggau Bank Simpanan Nasional (BSN); lalu MoA iya nya disain entara Universiti Malaysia Sarawak (UNIMAS) enggau Hab Ekonomi Digital bekaul ngemansangka pengelandik robotik enggau ke bukai.

IDECS ke udah mujur diatur nya digulu 2,379 iku pesereta dibandingka semina 1,703 ba taun 2017.

Entara menua ke bisi nganjung pesereta IDECS 2018 iya nya Kanada, Australia, Austria, Estonia, Singapura, United Kingdom enggau Malaysia empu.