Anda di sini

Madius, Peter, Ewon popogirot ningkokoton KDM doid porinta Warisan Sabah

KOTA KINABALU: Kinosilihan di tolu momuruan Kadazandusun Murut Momogun (KDM) do montiri doid suang kabinet di Boyoon Montiri Datuk Seri Mohd Shafie Apdal kaanu popogirot do ningkokoton tinaru dilo doid suang pomorintaan Parti Warisan Sabah.

Di minsosodop tadau kotolu (16/5/18) oinsanan oh tolu montiri dilo tuminaru doid doguang di Luguan Pogun Sabah, Tun Juhar Haji Mahiruddin hilo id istana pogun hiti miampai di montiri om panakadai montiri ngawi do suai.

MADIUS Tangau
MADIUS Tangau

“Duwo momuruan nosiliu montiri nopo nga mantad parti do Upko om do naamot songulun siniliu montiri nopo nga mantad parti do Warisan,” ka di poinsurat doid nuludan ngaran pinatayad kuminaa toinsanan papaabar hiti.

Ih Porosidin Upko, Datuk Wilfred Madius Tangau nopo nga siniliu sabaagi do Kumoduwo Boyoon Montiri miampai mongigit do komontirian pongindopuan om pomorunan.

Ih timbang porosidin do Warisan, Datuk Peter Anthony nopo nga siniliu do montiri koburuon infrastruktur om do naamot ih luguan komulakan Upko, Ewon Benedick nopo nga siniliu sabaagi montiri do koburuon labus kakadaian.

EWON Benedick
EWON Benedick

Madius, Puru Parlimen Tuaran siniliu do Puru Koundangan Pogun Sabah (Adun-dilantik), Peter nopo nga Adun do Melalap om do naamot ih Ewon nopo nga Adun do Kadamaian.

Oinsanan tolu momuruan dilo nopo nga nointutunan no laid do aparagat monoguang kopoburuan sunduan tinaru mamasok Sabah om agayo kalansanan do kaanu oh toinsanan momuruan dilo popotilombus do pinggisaman diolo popoingkawas po kawagu sunduan tinaru tokou.

PETER Anthony
PETER Anthony

Madius solinaid diti nopo nga momuruan di aparagat monoguang kopoburuan kopongiaan boros Kadazandusun, ih Peter nopo nga porosidin do KDM Malaysia om do naamot ih Ewon nopo nga aparagat monoguang pinggisaman ngawi do komulakan mamasok Sabah.

Kabinet Sabah nopo nga nouludan do 11 komontirian om montiri suai nopo nga linansan do mamasok Islam (4) om tinaru Sina (4).