Anda di sini

Ekonomi Digital ulih ngangkatka ekonomi menua pesisir

Advertisement
 How Data Fuels Economic Growth’ nyerumba IDECS 2018, disempulangka Morshidi.  — Gambar Muhd Rais Sanusi
DIALOG: Abang Johari lebuh nyaut tanya ari mensia mayuh maya ke nyadi siku ari Panelis ti berandauka ‘Epilogue: How Data Fuels Economic Growth’ nyerumba IDECS 2018, disempulangka Morshidi. — Gambar Muhd Rais Sanusi

KUCHING: Ekonomi Digital dipechaya ulih mantu nyungkak ekonomi menua pesisir kelebih agi ngagai orang bumai bekebun.

Kepala Menteri Datuk Patinggi Abang Johari Tun Openg madahka perintah nengeri ngembuan formula tauka langkar enggau strategi ke pemadu manah ngambika peranak Sarawak ulih meretika nama ke dikumbai Ekonomi Digital.

“Ekonomi Digital tu pasal ngemeranka teknologi lebuh nuan deka ngangkatka pemanah tauka nyungkak ekonomi.

“Nya alai kitai ngarapka orang bumai bekebun menua pesisir deka ulih ngemeranka teknologi dalam pengawa ngasilka produk pemakai.

“Sida mega patut ngena teknologi baka ‘mobile payment’ sebagi ari nambahka penatai pemisi ke alai endur sida deka bulih pejalai mata duit ke betul enggau penatai pemisi ke betul,” ku iya.

Abang Johari mansutka pekara nya lebuh ke bejaku ba pengerami nutup Aum Besai Ekonomi Digital Antarabansa Sarawak (IDECS) 2018 ke diatur ba BCCK ditu, lemai kemari.

Bejaku baru, iya arap bendar ngena Ekonomi Digital nya takah ekonomi entara menua pesisir enggau mengeri ulih disemakka agi enda ngira sekalika ari segi fizik tauka ekonomi.

“Ngena chara tu kitai ulih nyingkang jauh agi lalu arap mih ke aku iya nya perintah nengeri ulih ngiga mayuh startegi ngambika peranak menua pesisir enggau mengeri ulih sama sebela ti ukai semina ba kaul fizikal tang mega tikas kaul ekonomi kededua,” ku iya.

Nambahka, nya iya madahka dikena nyapai penyulut nya mega begunaka sukung tiga faktor besai iya nya pelajar, modal mensia enggau peluang.

Nengah penyulut sereta penyukak ekonomi nya ku iya, Sarawak dipelabaka lebuh manggai ba taun 2030 ila deka nyadi sebuah nengeri di Malaysia ti pemadu maju tauka mujur ari segi ekonomi.

Iya mega madahka pelajar sereta ngelatih pakar mega entara pekara ulih mantu nengeri tu ulih nyadi maju dalam ekonomi.

“Aku arap bendar nengah tiga faktor, keterubah kitai ngembuan pengeraja asal, kedua kitai bisi 60 peratus ari penyampau tubuh di Sarawak iya nya orang biak ke beumur 50 taun ke baruh lalu kitai numbuhka kereja ungkup sida tu tang (orang biak) enda tau enda kreatif tauka landik nengkebang.

“Reti iya kitai ngena pakar dikena ngasilka penambah ngagai pengeraja asal ke dikembuan kitai.

“Ketiga, menua kitai chkup strategik dalam dunya ekonomi baru laban kitai semak enggau India, China sereta bisi menua Asian lalu tu peluang endur nyual tauka bekunsi produk,” ku iya seraya madahka enti Korea, Jepun, Singapura ulih kitai Sarawak mega ulih.

Sama bisi datai ba pengerami nya kemari tiga Sapit Kepala Menteri Datuk Amar Douglas Uggah Embas, Datuk Amar Awang Tengah Ali Hasan enggau Tan Sri Datuk Amar James Jemut Masing, Sekretari Perintah Nengeri Tan Sri Datuk Amar Mohamad Morshidi Abdul Ghani enggau kebukai.

  • oleh
  • Advertisement