KUCHING: Kaban Parlimen (MP) Serian, Datuk Seri Richard Riot Jaem ukai individu ti patut diterima dalam Pakatan Harapan (PH).
Chairman PH Nengeri, Chong Chieng Jen madah, ari skandal makai suap sekretari politik iya sebedau tu, ngasuh Riot ukai karakter ti patut diterima dalam PH.
Ngenang pasal berita ti madahka iya (Riot) ti deka nyemilik PH, iya ukai individu ti patut diterima dalam pakatan enggau isu skandal makai suap kaban politik iya ke diatu benung dipansik.
“Nyema pekara tu nyadi pan nengah atur iya patut disarap Komiti Nagang Pengawa Makai Suap Malaysia (SPRM) sebedau diterima sebarang komponen PH.
“Sekalika tama PKR tauka Amanah tang ukai DAP, aku ke nyadi chairman DAP endang nulak iya nyemilik parti kami,” ku iya lebuhka dikerandau pengarang berita pengudah baum begulai enggau pengari Opis Pelajar Nengeri ditu, kemari.
Chong ke mega MP Stampin nengah penemu iya empu ngelalau parti komponen PH ke bukai di Sarawak ngambika enda sengapa nerima kaban komponen Barisan Nasional (BN).
Iya nyemetak madah kelebih agi ngagai sida ti bisi pemerat ba diri empu kelimpah karakter ke bisi ngaul diri ba ulah makai suap enggau ke bukai.
“Kitai berutang budi ngagai rayat ti milih PH, sida milih kitai ketegal pengingin deka meda perintah ti beresi enggau bisi integriti.
“Nya alai, nya nyadi singkang ti patut ari pun kitai dalam politik kitai,” ku iya seraya madahka penemu bekaul Riot deka dikenataika iya ngagai Chairman PKR Nengeri, Baru Bian.
Berebak enggau nya,Baru ti diripot bejaku nengah laman portal Malay Mail madahka nadai nerimapom peminta ari ex- Menteri Pengatur Pengereja Pengawa, Riot ng ambika nyadi kaban parti.
Ditanya sekalika PKR nerima Riot nyadi kaban nyema iya bisi minta, Baru m adahka kelalu tumu ba iya nyaut tanya nya diatu.
“Viral ba media rama madahka Riot udah nyuaka pom nyadi kaban nya enda amat “ ku Kaban Parlimen Selangau baru nya.
Baru m mega m adahka diri enda nyengala sekalika Riot, ke dipilih baru nyadi Kaban Parlimen Serian ba PRU tu tadi deka ny adi kaban PKR.
Iya madahka diri semina ninga berita selebubu sentang Riot, ke mega sapit presiden Parti Sa’Ati Rayat Sarawak (SUPP), ari orang ketiga.