Anda di sini

Ting besatup baru enggau Dr. Teo maya PRU14 tu

Advertisement

MIRI: Chalun BN ke kerusi P219 Miri, Datuk Sebastian Ting enda takut deka besatup enggau orang ke deka betengali alan enggau iya, Ketuai PKR Miri, Dr. Michael Teo maya PRU14 tu ila.

Lebuh dikerandau ulih pengarang berita lebuh datai ba Padang Bilun Miri dalam urung pukul 4 lemai hari Dua tu tadi, Ting madahka pemerat deka menang ba kerusi nya pengudah iya alah laban Dr. Teo lima taun tu ke udah.

“Tiap pengawa bepilih bisi empas iya empu. Taja pia, aku enda nyerah alah lalu tetap deka betunga enggau pengawa nya, sereta enggau naka ulih ngerampas kerusi nya pulai baru ke BN,” ku iya.

Ting mega meri terima kasih ngagai pemesai BN ke arapka iya sereta agi meri iya peluang bediri ba kerusi nya lalu ngambi kerusi nya pulai baru ke BN (aro penyakal).

“Aku mega meri terima kasih ngagai BN enggau penyukung SUPP di Miri, ketuai SUPP, Menteri Muda Pengawa Dagang Temuai, Seni enggau Adat Pesaka Datuk Lee Kim Shin, Datuk Bandar Miri, Adam Yii sereta sida bukai ke udah bebendar endar gawa ke aku ngelama tu.

“Kitai semua udah bendar gawa lalu tu ke meri aku penegut pengarap deka ngaga pengawa aku enggau naka pemanah lalu menang ba kerusi Miri,” ku iya.

Ting ti mega nyadi ADUN Piasau sereta sekretari besai ke SUPP Central diberi mandat bediri ba kerusi parlimen P219 maya PRU14, ke deka digaga kena 9 Mei tu ila.

Advertisement