KUCHING: Chalun Barisan Nasional (BN) ti deka bediri di Parlimen Saratok, Jagah @Subeng Mula, 55 besemaya deka naka ulih ngerejaka pengawa enggau manah nyadi chalun Barisan Nasional (BN) dikena nentuka BN menang ba Pengawa Bepilih Besai ke-14 (PRU14).
“Aku besemaya enda nejuka pengandal ke udah diberi parti (Parti Demokratif Progesif) sereta BN ngagai aku. Aku deka ngaga pengawa aku enggau naka ulih dikena ngulihka pemenang BN 9 Mei tu ila.
“Saya berikrar tidak akan mempersia-siakan kepercayaan diberikan oleh parti (Parti Demokratif Progesif) dan BN kepada saya. Saya akan melakukan yang terbaik untuk kemenangan BN pada 9 Mei nanti.
“Lalu enti diberi mandat ila, aku deka majakka pengawa aku gawa ke rayat. Tu tanggungpengawa sereta pengarap ke besai ba aku, ngenataika peneka sereta pengarap mensia mayuh ke diau di sitak P.205 Saratok,” ku iya.
Iya madah munyi nya lebuh dikerandau pengudah enggau ngulu pengawa betemu enggau Kepala Menteri Datuk Patinggi Abang Johari Tun Openg enggau chalun BN sereta pengawa nyerahka surat kuasa ngagai chalun BN Sarawak ba Indu Opis Parti Pesaka Bumiputera Bersatu (PBB) ditu, kemari.
Subeng madah iya deka berengkah bejalai betemu enggau rayat, sereta ngulihka penerang bekait enggau pekara tauka penanggul ke nyadi di pun menua ngambika pekara tauka penanggul nya deka dikemutar enggau manah.
Subeng nyadi entara 15 mua baru ke dibantai ulih BN Sarawak maya PRU14.
Bejaku pasal P.205 Saratok, iya madah Saratok agi tinggal ari sukut pemansang infrastruktur lalu iya patut dikemutar enggau jampat.
“Kediatu aku bedau ulih nimbal pasal sitak Saratok enggau silik agi, tang utai ke disebut aku, iya nya Saratok agi tinggal ari sukut pemansang,” ku iya.
Subeng siku orang ke endang asal ari Saratok, sebedau tu kala gawa di Bintulu enggau Petronas dalam taun 1985. Kena taun 2000 tu tadi, iya muka kompeni dagang kediri empu datai kediatu.
Maya PRU13 Tan Sri William Mawan Ikom maya nya ke agi nyadi Presiden Parti Demokratik Progresif Sarawak (SPDP) tauka PDP diatu, ngalahka chalun Parti Keadilan Rakyat (PKR) Ali Biju enggau undi majoriti 2,081.