Anda di sini

Rayat meseti beserakup nyukung BN lalu nentuka pemansang terus dipejalai

Advertisement

SIBU: Kepala Menteri Datuk Patinggi Abang Johari Tun Openg minta rayat ditu beserakup nyukung Barisan Nasional (BN) dikena ngemujurka agi pengawa ngambi pulai hak nengeri Sarawak.

Iya madah, ba BN semua komponen parti diatu nadai bepenanggul begulai enggau pangan diri ketegal deka meda nengeri tu ngembuan jaku ti kering sereta dipebasa.

“Penyarut ke nyadi ba menua bukai anang ngibuh laban ke beguna iya nya kitai di Sarawak meseti beserakup ngambika mujur ngambi hak ba Sempekat Malaysia 1963 (MA63).

“Nya alai, ketegal tu mega BN nganjung 15 iku chalun baru ba Pengawa Bepilih Besai Ke-14 (PRU14) kelimpah penyandang sebedau tu ba semua 31 iti penuduk laban kitai deka meda nengeri tu ngembuan jaku ti kering sereta dipebasa enggau didinga orang bukai,” pia ku iya madah.

Iya mantaika jaku tu maya bejadi Seminar Pembangunan dan Kepimpinan Ketua Masyarakat Dan Ketua Kaum (sitak Sibu, Mukah enggau Kapit) ba Kingwood Hotel ditu, kemari.

Chairman BN Nengeri tu mega madah, diatu bansa China udah beserakup alai SUPP enggau UPP bebaik lalu mutuska Andrew Wong nyadi chalun nengah tikit SUPP bediri ba Parlimen Sibu.

Penyerakup tu ku iya meseti ditunda raban bansa Bumiputera nengeri tu.

“Berindik ari nya, 50 peratus chalun BN serak tu endang orang baru ngambika kitai deka mujur agi ngambi pulai nama hak nengeri Sarawak.

“Pemujur BN ba PRU tu mega besai reti ba pengawa ngemansangka agi menua pesisir baka jalai alun, bekal ai sereta pemansang bukai,” ku iya madah baru.

Nambahka jaku iya ku Abang Johari, nengeri tu bela ngemeratka teknologi baru nyengkaum pengawa ba betanam betupi.

Iya madah, ketegal nya, pelilih Tunoh di Kapit kelimpah di Sadok diperambu deka digagaka padang bilun dikena mai asil betanam betupi.

“Kitai deka ngemansangka sitak Kapit nyadi menua ti ngeluarka asil betanam betupi kelimpah ari Betong.

“Di Kapit mega deka dikemansangka enggau pengawa nanam getah bansa baru,” ku iya sambil madah pengawa mai asil betanam nya deka muntang agi enggau penembu jalai ari Sibu ke Kapit udah tu ila.

Bela datai maya tu iya nya Sapit Kepala Menteri Datuk Amar Douglas Uggah Embas, Menteri Dagang Antarabansa enggau E-Dagang Dato Sri Wong Soon Koh, Menteri Perengka Mensia Mayuh Datuk Dr Stephen Rundi Utom, Menteri Muda ba Opis Kepala Menteri (Integriti enggau Ombudsman) Datuk Talib Zulpilip enggau Datin Patinggi Datuk Juma’ani Tuanku Bujang.

  • oleh
  • Advertisement