SIBU: Parti Keadilan Rayat (PKR) Pampang Julau ngarapka chalun PRU14 di Parlimen Julau betengali alan aja.
Chairman PKR Pampang Julau Semana Sawang madah, kebuah pia sida deka meda semina antara Barisan Nasional (BN) enggau chalun ngatika diri bediri dia.
“Kitai deka meri awak ngagai dua iku chalun aja bediri ditu iya nya chalun BN, Datuk Joseph Salang enggau Larry Sng ti endang ngembuan mayuh peneleba politik ba parlimen tu.
“Nya alai, kami minta ampun ngagai bala penyukung PKR di Parlimen Julau ketegal enda nganjung chalun,” pia ku iya madah ngagai pengarang berita, kemari.
Taja pan baka nya, Semana ngarapka bala penyukung PKR dia landik milih sapa chalun ke patut nyadi pengari sida.
“Amat kitai enda lantang ati ketegal enda bediri ditu nambahka kitai mega mayuh penyukung tang kitai ngarapka bala penyukung besabar dulu nganti Pengawa Bepilih Nengeri (PRN) udah tu ila,” ku iya madah baru.
Ketuai Publisiti enggau Multimedia PKR Pampang Julau, Jimmy Manju madahka piak sida enda enggaika pemutus PKR tu laban Parlimen Julau endang kubu kuat BN.
“Sebedau tu kitai endang bisi siku chalun deka dianjung bediri ba Parlimen Julau.
“Tang ketegal pemutus ari Biro Pusat, PKR setuju enda nganjung chalun ba sitak Julau.
“Kami kasihka penyukung ditu lalu minta ampun ngagai sida,” pia ku iya madah.