KUCHING: Sekretari Besai Barisan Nasional (BN) Sarawak, Datuk Alexander Nanta Linggi ngarapka penyandang BN ke enda dichalunka baru terus entap enggau parti.
Ba penemu iya, pekara sekalika dichalun tauka enda setiap kali maya pengawa bepilih kunsil nengeri enggau besai ukai nyadi pekara baru, laban semua orang bisi ati sereta deka mantu raban bansa ba endur diri.
Pekara nya (enda dichalun) ukai nyadi siti penanggul tauka isu, laban dalam sistem perintah sereta menua demokrasi kitai temegah ati laban mayuh orang deka megai tanggungpengawa ti amat besai ngemansangka kandang menua, ku Nanta.
“Aku ngarapka sida ke sekali tu ti nadai peluang nadai nasit dipilih nyadi chalun, terus entap enggau parti.
“Aram mih kitai sama dalam parti komponen kitai enggau BN laban tanggungpengawa ngemajuka sesebuah kan dang endur enggau nengeri endang tanggungpengawa begulai, ngambika kitai lempung agi ngemajuka nengeri enggau menua,” ku iya.
Nanta ti mega Sekretari Besai Parti Pesaka Bumiputera Bersatu (PBB) nyebut pekara nya lebuh dikerandau raban pengarang berita bekaul enggau penyandang ke enda dichalunka baru.
Dulu ari nya Nanta nerima Surat Kuasa nyadi chalun Parlimen Kapit ari Chairman BN Sarawak ti mega Kepala Menteri Datuk Patinggi Abang Johari Tun Openg ba Indu Opis PBB ditu, kemari.
Bejaku baru, iya madah dalam sebuah parti baka sebuah ruang bilik dalam politik, lalu patut nyadi parti ti besai reti ari diri empu.
“Aku ngelalau sida, enti deka mantu rayat kitai patut beratka rayat ari diri empu.
“Enti kitai kelalu beratka diri empu, lebuh enda dipilih nyadi chalun kitai lalu ransi sereta ngelaban, reti iya nuan lebih agi beratka diri empu,” ku iya.
Ba Pengawa Bepilih Besai Ke-14 (PRU14) entara penyandang ke enda dichalunka baru iya nya Dato Sri Dr James Dawos (Puncak Borneo), Datuk William Nyallau Badak (Lubok Antu), Tan Sri William Mawan (Saratok), Datuk Norah Abd Rahman (Tanjong Manis), Datuk Wahab Dolah (Igan), Datuk Joseph Entulu (Selangau) enggau Datuk Ahmad Lai Bujang (Sibuti).