KUCHING: Pengawa enchalunka Datuk Wong Kee Yew @ Andrew Wong ba Parlimen Sibu bepun ari Parti Rakyat Bersatu (UPP) ti sepenemu enggau Parti Rakyat Bersatu Sarawak (SUPP).
Presiden UPP, Datuk Wong Soon Koh madahka pekara nya udah ditemu kaban parti sereta nadai kaul enggau Sempekat Pemereti Ati (MoU) ke disain kededua parti.
“Nadai MoU pasal enchalunka Andrew, semina sepenemu aja.
“Nya (MoU) deka ngerejaka pengawa enggau pengabis manah pengudah pengawa bepilih ila. Kitai deka berandauka enggau silik bakani kededua parti ulih beserakup ngambika bisi pengari ti lebih manah dalam BN.
“Lalu kaban parti pan udah nemu pasal MoU. Enti nuan macha MoU, iya siti proses ti lama deka diputarka ulih kededua parti nengah Jawatankuasa Perundingan. Kami terus baum,” ku iya.
Wong dikerandau raban pengarang berita lebuh ke bisi datai ngulu pengawa nyuaka surat kuasa ngagai chalun BN PRU14, ke diatur ba Indu Opis Parti Pesaka Bumiputera Bersatu (PBB) ditu, kemari.
Semina Andrew aja kaban parti ke nyereta SUPP sereta nyadi chalun BN.
Nitihku iya Jawatankuasa Perundingan nya nyengkaum enam kaban enggau ukai kaban empat, ke alai SUPP diarika Datuk Seri Richard Riot lalu UPP diarika Datuk Dr Jerip Susil.
“Enam ari kami deka duduk, engka pengudah PRU ila sereta ngelangkar perambu baka ni parti ulih beserakup. Tu udah tentu proses ke panjai,” ku iya.
Ditanya sekalika iya deka meri jalai ngagai Presiden SUPP Datuk Dr Sim Kui Hian, Wong madahka nya lebih ngagai pengingin iya.
“Aku enda meri jalai, semua tu pengingin aku. Aku ngasaika udah datai ba maya iya, tambah mega anak aku bediri minta pilih, udah datai ba maya aku nyeliah diri. Aku enggai ngaul diri kelalu lama.
“UPP deka terus nyingkang nyentuk datai ba maya iya UPP ulih beserakup enggau SUPP. Nya meh juluk kami. Juluk kami ba pengujung iya nya penyerakup ti meruan,” ku iya.
Berebak enggau tu lebuh ditanya bekaul enggau iya ti deka ngetu pengudah timpuh servis abis sereta sapa penganti iya, Wong madahka, agi ke lalu tumu endur deka madah bagi sapa ke patut.
Ku iya UPP bisi orang baru ke megai tanggungpengawa parti.
“Diatu kelalu tumu deka madahka sapa bagi ke nganti. Aku bedau agi milih sapa penganti,” ku iya.