Anda di sini

Sayap Nembiak SUPP udah ngelancharka EDGE napi PRU14

Advertisement
 Dr Sim (tujuh kiba) enggau Tiang (engkadah ke langit) ngelepaska gelembung raban nembiak SUPP ngelaika sida udah sedia napi GE14.
BEJADI: Dr Sim (tujuh kiba) enggau Tiang (engkadah ke langit) ngelepaska gelembung raban nembiak SUPP ngelaika sida udah sedia napi GE14.

KUCHING: Sayap nembiak Parti Sa’ati Rayat Sarawak (SUPP) udah ngelancharka lambang baru sida ‘indu manyi’ dikumbai EDGE dikena ngayanka diri udah sedia napi Pengawa Bepilih Besai Ke-14 (GE14) kena 9 Mei tu.

Bejaku lebuh pengawa ngelanchar nya, Ketuai Nembiak SUPP Michael Tiang madahka lambang baru nya mega ngelaika identiti baru sayap nembiak.

“Indu manyi nyadi lambang SUPP, kitai udah datai enggau lambang indu manyi baru ungkup sayap nembiak, ke alai dikumbai kami EDGE.

“Tu lambang indu manyi baru ngayanka tim raban nembiak kami udah sedia gawa ngagai renggat baruh, gawa ngetanka Sarawak enggau SUPP,” ku iya.

Ngelansa pasal lambang nya, ku Tiang, urup E ungkup jaku Enthusiastic, D ungkup jaku Dynamic, G iya nya Gritty lalu E ungkup jaku Effective.

Baka ungkup GE14 tu, ku iya, raban nembiak SUPP udah sedia ngagai rintai mua lalu meri sukung ngagai semua chalun Barisan Nasional (BN).

“Kitai mega deka ngetanka renggat baruh nengah media rama, off line enggau online, kitai deka bisi dia,” ku iya.

Tiang beratika pengawa ngemaruka sayap nembiak SUPP iya nya tanggungpengawa ngibun rebak baru nyadi raban ngetanka pengawa nyaga Sarawak.

Ku iya, sayap nya mega udah dilempaika tanggungpengawa nempa pedagang ari raban nembiak ngaul diri dalam ekonomi digital inisiatif dipejalaika Kepala Menteri Datuk Patinggi Abang Johari Tun Openg.

Lambang indu manyi baru raban nembiak SUPP udah dilanchar Menteri Kaunsil Kandang Menua enggau Pengawa Berumah ke lalu nuadi Presiden SUPP, Datuk Dr Sim Kui Hian.

Advertisement