KUCHING: Parti Sa’ati Rakyat Sarawak (SUPP) ngelalu penatai kaban ari Parti Rakyat Bersatu (UPP) berakup dalam SUPP, ku Presiden SUPP Datuk Dr. Sim Kui Huan.
Bejaku ngagai pengarang berita pengudah pengawa nyain Sempekat Pemereti Ati (MoU) enggau UPP kemari, iya madah parti benung ngaga pengawa ke bekaul enggau atur nerima pemulai kaban UPP ngagai SUPP.
“Aku gaga UPP nerima kangau berakup. Parti (SUPP) ngaga pengawa ke ulih ngemujur pemulai kaban UPP ngagai SUPP.
“Baka ke suah dipadahka aku, mayuh sida (UPP) tu asal ari SUPP. Sida udah mayuh mantu SUPP lalu pia mega mantu Sarawak.
‘Kitai ngelalu pemulai sida lalu nengah penyerakup tu kitai deka tegap agi,’ku iya.
MoU kemari disain Sim (ngarika SUPP) enggau presiden UPP Dato Sri Wong Soon Koh lalu dikemata Kepala Menteri ke mega Chairman Barisan Nasional(BN) Nengeri Datuk Patinggi Abang Johari Tun Openg.
Nengah MoU nya UPP enggau SUPP ngiga jalai berakup nengah siti entiti ngambi ulih ngintu pemaik komuniti China enggau komuniti bukai nengah semengat BN.
Sim ke mega Menteri Opis Kunsil enggau Pengawa Berumah nambah, komuniti China ti diarika SUPP lalu digempung UPP deka meri sukung ke pemadu tegap ngagai Kepala Menteri (Abang Johari).
“Kitai deka nempa siti gempung ke tegap ngambi ulih ngeringka agi Sarawak kelebih agi ba pinta kuasa ke patut nengah Sempekat Malaysia 1963(MA63).
“Kitai mega keran nentuka Sarawak teulihka pemujur ke besai ba Pengawa bepilih Besai Ke-14(PRU14) ti deka datai lalu nentuka pemujur agenda Kepala Menteri ba pekara ekonomi enggau digital,’ku iya.
Ngenang sentang chalun (SUPP enggau UPP), Sim netapka chalun deka bediri nengah tikit SUPP.
Munyika padah kepala menteri ku Sim, chalun meseti bediri nengah tikit parti dalam gempung BN.
“Enti penuduk nya diempu PDP, chalun deka bediri nengah tikit PDP, enti penuduk nya diempu SUPP, chalun bediri nengah tikit SUPP.
“Enti penuduk nya diempu PBB, chalun bediri nengah tikit PBB lalu pia mega ba penuduk PRS, chalun bediri nengah tikit PRS,”ku iya.