Anda di sini

Sarawak deka nganjung lapan tim nyereta Kem Kadet Renggat Menua

KUCHING: Sarawak deka nganjung lapan tim ke mungkur 40 iku kaban Kadet Bomba enggau Penyah Penusah Sarawak bepekit ba sebengkah Kem Kadet Renggat Menua ti deka diatur di Kedah taun tu.

Nitihka penerang Direktor Opis Bomba enggau Penyah Penusah Sarawak Nor Hisham Mohammad madah Sarawak sekali agi deka ngerampas gelar champion ke kala dipegai dulu agi ari tu.

Udah dua taun kitai enda nganjung tim bepekit ketegal ti nadai belanja ke alai Sarawak suah nyadi champion pekit tu.

Tang ba taun tu, pemar nya diputar pengudah nerima timbal positif ari opis Pelajar Pelilih Kuching.

Tikit bilun deka dipelanja Opis Pelajar Nengeri, lalu belanja makai ngirup sereta belanja pengangkut dipelanja Opis Bomba,’ku iya nyaut tanya pemberita ba seiti pengerami di Kem Santubong ditu, kemari.

Dulu agi ari nya iya nutup Kus Ketuai Platun enggau Ngelekat Tanda Pangkat Sarjan Tim Kadet Bomba enggau PenyahPenusah Malaysia ungkup Sekula Nengeri Sarawak 2018.

Ba sentang belanja bukai, Nor Hisham madah deka dipelanja nengah komitmen sekula, sekalika ari bala apai indai nembiak, PIBG, pengari rayat tauka gempung korporat.

Iya nambah pemar tu balat diasai ketegal ti nadai nerima sesen belanja ungkup tuju nya.

Dikena ngelimat belanja, ijinsi deka milih sekula ari Zon Kuching ngarika Sarawak di Kedah,”ku iya nandu.

Kus Ketuai Platun enggau Ngelekat Tanda Pangkat Sarjan Tim Kadet Bomba enggau PenyahPenusah Malaysia pengelama 3 hari dipasuk 13 sekula lalu mungkur 59 iku ketuai platun.

Sekula ke nyereta iya nya SMK Kuching High, SMK Batu Lintang, SMK Datuk Patinggi Haji Abdul Gapor, SMK Tun Abang Haji Openg, SMK Seri Setia, SMKA Tun Ahmad Zaidi enggau SMK Demak Baru.

Bela nyereta Kolej Vokasional Kuching, Maktab Rendah Sains Mara Kuching, SMK Penrissen No 1, SMK Matang Hilir, SMKA Sheikh Hj Othman Abdul Wahab enggau SMK Batu Kawa.