BAU: Kurang bekal pemakai ari dalam menua ngujungka Malaysia ngeluarka belanja besai ba penyampau RM4 bilion ninting taun ba import pemakai dikena nentuka rayat bisi chukup bekal pemakai.
Sapit Menteri Betanam Betupi enggai Industri Asas Tani Datuk Anthony Nogeh Gumbek madah opis menteri diatu nyendia mayuh program ke tau meransang peranak menua tu ngambi bagi ba aktiviti betanam betupi ke tau nambah bekal pemakai.
Ku iya, program mega bela disedia di Sarawak ngambi ulih nentu peranak nengeri tu sama bela ampit bantu perintah lalu nyaup nambah penatai pemisi sida nengah pengawa bekebun, nupi jelu tauka pengawa berikan.
“Tetiap menua di dunya keran nentuka menua sida ngembuan chukup bekal pemakai ungkup rayat. Tang di Malaysia bekal pemakai kitai mengkang kurang.
“Ninting taun Malaysia ngimpot enda kurang ari RM4 bilion ba bekal pemakai ari menua luar tajapan penyampau peranak menua tu semina 32 juta.
“Belanja impot kitai kelalu tinggi tajapan penyampau peranak menua tu enda mayuh. Enti dibandingka enggau Indonesia, sida ulih ngeluarka bekal pemakai ungkup diri empu tajapan penyampau peranak menua nya manggai 200 juta.
“Kitai di Malaysia rindu ngimpot. Kitai mayuh tanah, tang enda dikereja kelimpah ti nadai kiruh deka bekebun,” ku iya.
Nogeh mansutka jaku nya rambau bejadi pengawa nyuaka bantu nanam nanas di Kampung Stenggang kena Hari Minggu tu tadi.
Iya nambah, ulah ti kelalu bepanggai enggau bekal pemakai ke diimpot deka meri empas ke besai ba rayat, kelebih agi ba maya rega mata duit nurun enggau rega barang impot niki.
“Enti kita bepanggai enggau pemakai ke dimport, maya mata duit kitai nurun, kitai nyalahka Menteri Besai. Baka ke Menteri Besai aja ke makai bekal pemakai penyampau RM4 biliun nya,” ku iya.
Ba sentang pengawa nanam nenas, Nogeh madah perintah diatu meransang orang bekebun nanam nenas bansa MD2, ke ngembuan kualiti diekspot sereta dikedeka menua China.
Ku iya nenas udah nyadi sebengkah utai tanam ke tau mai pengaya ngagai menua munyika padah Menteri Besai ba bajet 2018.
“Kitai meransang orang bekebun nanam nenas MD2 enggau buah rian Musang King ketegal kededua buah tu ulih diekspot ke menua luar,” ku iya.
Iya madah seiti projek pemungkal nanam nanas MD2 udah dilanchar ba tanah pemesai 50 ekar di Kampung Padang Pan, Bau ba bulan Februari ke dikemujur Sapit Kepala Menteri Datuk Amar Douglas Uggah.