Anda di sini

Kadet Bomba patut disikap enggau pengelandik

Sida ulih nyaup ngerara api ari ti ngelekai nyema bisi penusah enda disadang baka tasah angus ba sekula

 Nor Hisyam ngelekat tanda pangkat sarjan ba lengan siku kadet Bomba di Kem Santubong kemari.
KELAI BASA: Nor Hisyam ngelekat tanda pangkat sarjan ba lengan siku kadet Bomba di Kem Santubong kemari.

KUCHING: Direktor Opis Bomba enggau Penyah Penusah Sarawak Nor Hisham Mohammad madah kadet Bomba ulih ngerara api ari ti majak ngelekai nyadi maya bisi penusah angus ba sekula.

Ku iya, raban nya ulih mantu enti sida disikap enggau penau enggau pengelandik madamka api.

Ba taun ke udah, bisi lapan kes sekula angus di serata Sarawak lalu kes ke pemadu baru siti sekula bisi angus ditu.

Pekara ke deka dipadahka aku iya nya penusah angus tu mujur dipadam nembiak sekula enggau orang ke gawa ba sekula,”ku iya.

Iya mansutka jaku nya ngagai pemberita pengudah nutup Kus Ketuai Platun enggau Ngelekat Tanda Pangkat Sarjan Tim Kadet Bomba enggau PenyahPenusah Malaysia ungkup Sekula Nengeri Sarawak 2018 di Kem Santubong kemari.

Nor Hisham nambah kes angus nya diatu mengkang ditasat ketegal ti deka nemu kebuah sida begunaka 20 perengka madam api maya nya.

Nama kebuah begunaka kelalu mayuh perengka madam api ? Engka sida nemu madamka api tang chara enda engkeman.

Berindik enggau nya, raban kadet di sekula nyengkaum pengajar, staf sekula sereta nembiak sekula meseti ngembuan pengelandik enggau penau Bomba.

Aku pechaya sida ulih mantu mutarka isu sekula angus,’ku iya.

Ngenang kaul ke sama Nor Hisham madah kadet Bomba di nengeri tu udah majak nambah enti dibandingka ba taun 2015.

Ba taun 2015 ku iya, bisi 79 tim kadet Bomba dirijista lalu nya mungkur 5,474 iku kaban nyengkaum 158 iku pengajar kadet.

Ungkup taun 2016 enggau 2017 penyampau nambah ngagai 81 tim sereta mungkur 5,493 kaban sereta 160 pengajar.

Ba taun tu, tim kadet bomba nambah ngagai 92 tim nengah 7,146 iku kaban sereta 258 iku pengajar.