SIBU: Kaunsil Servis Komuniti Parti Rakyat Bersatu (UPP) Sibu deka bejadika projek pemungkal perengka pengerara api chap Hyprex ba dua rumah panjai pengudah pengerami Taun Baru China.
Chairman iya, Datuk Andrew Wong madah, dua rumah panjai ke dipilih iya nya Rumah Lidwina Mathew di Nanga Tutus enggau sebuah agi rumah panjai ba sitak Dudong.
“Tu reti iya ba ujung Februari, kitai deka nguji lalu perambu kitai iya nya nyendiaka genap pintu rumah ba rumah panjai enggau perengka pengerara api tu.
“Kitai deka ngajar chara nguna pengerara api tu lalu nengah perengka pengerara api Hyprex tu chukup senang diguna,” ku iya madah ngagai pemberita, apin lama ke udah.
Nitihku Wong, perengka pengerara api Hyprex ngena teknologi Swiss lalu ulih beretan pengelama tiga taun.
Lepas tiga taun, perengka pengerara a[i tu patut diperesa dikena nentuka sekalika agi ulih dikena tauka enda.
“Pengelama pengetan perengka tu iya nya lima taun.
“Lepas tiga taun nyema agi manah diperesa, perengka pengerara api tu agi ulih dikena ungkup timpuh dua taun,” ku Wong.
Berebak enggau nya, Wong ke mega chairman Perambu Sibu 1 (RS1) madah, piak iya udah ngelala bagi rumah panjai ke bisi enggau nadai paip bomba.
Ungkup rumah panjai ke empai bisi paip bomba ku iya, sida deka diberi perengka pngerara api chap Hyprex.
“Ngagai rumah panjai ke bisi paip bomba, kitai minta piak bomba meresa dulu dikena nentuka iya agi ulih dikena.
“Udah nya, kitai deka meri hos ke ulih disambung ngagai paip bomba ini awakka ulih dikena peranak rumah panjai maya bisi tasah,” ku iya.
Kelimpah nya, RS1 penyampau RM1 juta diagih dikena nyendia perengka pengerara api, lebih agi ba sitak menua pesisir.