KUCHING: Gerempung etnik di nengeri tu dilalu meri dilalau meri peransang ngagai pengarang bansa diri ngambika ngasilka utai karang ngena jaku asal tauka bansa.
Direktor Dewan Bahasa dan Pustaka (DBP) Pampang Sarawak, Dr Hazami Jahari madahka chara nya ulih mantu ngetanka jaku bansa.
Iya arap bendar tetiap 27 etnik di nengeri tu bisi pengarang ti kreatif tang enda nulis ngena jaku diri.
“Nya alai kitai minta bantu gerempung etnik meri peransang ngasilka utai karang ngena jaku bansa diri ngambika ulih ngetanka asal jaku nya,” ku iya.
Hazami mansutka pekara nya dalam aum pengarang berita mantaika nama pemenang Anugerah Sastera Negeri Sarawak (ASNS) 2017 ke diatur ba bilik baum Dewan Bahasa dan Pustaka (DBP) ditu, kemari.
Lebuh ke ngenang pasal gelar nya, penyereta pengarang dalam kategori jaku kurang nerima sambut ari raban pengarang.
Ku iya, DBP ke nyadi pengatur ASNS 2017 bisi muka kategori Anugerah Penulis Sarawak Kategori Bahasa ungkup Jaku Iban, Melayu Sarawak, Bidayuh, Melanau, China, Inggeris enggau Orang Ulu.
“Tang ke bisi nganjung penyereta semina dalam Jaku Iban, Melayu Sarawak enggau China.
“Kitai (DBP) deka terus muka kategori tu dikena kitai meri peransang ngambika jaku nya ulih diguna.
“Taja nadai chalun tang engka bisi asil karang tang enda chukup, nya kebuah nadai orang ke dichalun ungkup Jaku Bidayuh, Melanau sereta Orang Ulu,” ku iya.
Aum pengarang berita nya ti digulu Menteri Muda Pelajar enggau Pansik Teknologi ti mega chairman ASNS, Dr Annuar Rapaee mega ti madahka pengawa ngarang nya beguna.
“Pengawa ngarang penemu tu beguna amat sereta meri empas ti manah ngagai pengelantang raban bansa,” ku iya seraya ngarapka gelar ulih meri peransang ngagai pengarang di nengeri tu.